அண்ணா பல்கலைக்கழகம், அண்ணா நகர் சிறுமி விவகாரம் – சட்டப்பேரவையில் பதிலளித்த முதலமைச்சர் மு.க.ஸ்டாலின்
அண்ணா பல்கலைக்கழக விவகாரத்தில், யார் அந்த ‘சார்’ என கேள்வி எழுப்பும் எதிர்க்கட்சிகள், அதற்கான ஆதாரம் இருந்தால், விசாரணை குழுவிடம் தெரிவிக்கலாம் என முதலமைச்சர் மு.க.ஸ்டாலின் கூறினார். மாணவி பாலியல் வன்கொடுமை தொடர்பான, கவன ஈர்ப்பு தீர்மானத்தில், முதலமைச்சர் மு.க.ஸ்டாலின் சட்டமன்றத்தில் பதிலுரை அளித்தார்.
நடந்துவரும் சட்டப்பேரவை கூட்டத்தொடரில், அண்ணா பல்கலைக்கழக மாணவி பாலியல் வன்கொடுமையை கண்டித்து, பல்வேறு அரசியல் கட்சிகள் கவன ஈர்ப்பு தீர்மானம் கொண்டு வந்தன. இதற்கு பதில் அளித்த முதலமைச்சர் மு.க.ஸ்டாலின், பல்கலைக்கழகத்தின் பெயரைச் சொல்லி, அப்பெயருக்கு களங்கம் ஏற்படுத்த விரும்பவில்லை என தனது உரையை தொடங்கினார். மாணவி பாலியல் வன்கொடுமை வழக்கில் மேற்கொள்ளப்பட்ட நடவடிக்கைகளை பட்டியலிட்ட முதலமைச்சர், இவ்விவகாரத்தில் வேறு யாரேனும் குற்றவாளிகள் இருப்பது தெரியவந்தால், கடும் நடவடிக்கை எடுக்கப்படும் என உறுதிஅளித்தார்.தொடர்ந்து பேசிய முதலமைச்சர், ‘யார் அந்த சார்’ என கேள்வி எழுப்பும் எதிர்க்கட்சிகள் தங்களிடம் தகுந்த ஆதாரம் இருந்தால், விசாரணை குழுவிடம் ஒப்படைக்கவும் என வலியுறுத்தினார். கடந்த ஆட்சியில், சிபிஐ விசாரணையில் தான் பொள்ளாச்சி சம்பவம் அதிமுக பிரமுகர்களால் நடத்தப்பட்டது என்பது அம்பலமானதாக முதலமைச்சர் குற்றம்சாட்டினார்.
இதற்கு அதிமுகவினர் கடும் அமளி மூலம் தங்களது எதிர்ப்பை வெளிப்படுத்தினர். தொடர்ந்து பேசிய முதலமைச்சர், இது போன்ற 100 ‘சார்’ கேள்விகளை அதிமுகவைப் பார்த்து தன்னால் கேட்க முடியும் என்று கூறினார். மேலும், இது தொடர்பாக, பாஜகவினரின் கதைகளை எல்லாம் சொல்லி, அவையின் மாண்பைத் தான் குறைக்க விரும்பவில்லை என முதலமைச்சர் தெரிவித்தார்.
தொடர்ந்து பேசிய முதலமைச்சர், அண்ணா நகர் சிறுமி பாலியல் வன்கொடுமை வழக்கில், அதிமுக நிர்வாகி கைது செய்யப்பட்டதை சுட்டிக்காட்டினார். அதே சமயம், பல்கலைக்கழக மாணவி பாலியல் வன்கொடுமை வழக்கில் கைதானவர் திமுக அனுதாபியே தவிர, திமுக உறுப்பினர் அல்ல என்றும் தெளிவுப்படுத்தினார். குற்றவாளி திமுககாரராகவே இருந்தாலும் நிச்சயம் நடவடிக்கை எடுக்கப்படும் என்றும் முதலமைச்சர் மு.க.ஸ்டாலின் தெரிவித்தார்.
திமுக அரசுக்கு களங்கம் ஏற்படுத்துவதாக நினைத்துக் கொண்டு, உயர்கல்வி கற்க வரும் மாணவிகளை அச்சுறுத்தி, அவர்களின் கல்வியை கெடுத்து விடாதீர்கள் என்று முதலமைச்சர் வலியுறுத்தினார்.
