Tamilnadu – Page 2 – Namadhu Arasu

SIIMA 2026 விருது விழாவில், ‘டூரிஸ்ட் ஃபேமிலி’ திரைப்படத்திற்காக நடிகர் சசிகுமார் விருது பெற்றுள்ள நிலையில், ‘காந்தா’ திரைப்படத்திற்காக நடிகர் சமுத்திரக்கனி சிறந்த துணை நடிகர் (தமிழ்) விருதை வென்றுள்ளார்.

நட்பிலும், திரைப்பயணத்திலும் நீண்ட காலமாக இணைந்து பயணித்து வரும் சசிகுமாரும் சமுத்திரக்கனியும், ஒரே விருது விழாவில் தங்களது படைப்புகளுக்காக அங்கீகாரம் பெற்றிருப்பது ரசிகர்களிடையே மகிழ்ச்சியை ஏற்படுத்தியுள்ளது.

தமிழ், தெலுங்கு, மலையாளம், கன்னடம் உள்ளிட்ட பல மொழிகளில் தனது இயல்பான மற்றும் யதார்த்தமான நடிப்பால் தனக்கென ஒரு தனி அடையாளத்தை உருவாக்கியுள்ள சமுத்திரக்கனி, ‘காந்தா’ திரைப்படத்தில் தனது சிறப்பான நடிப்பிற்காக இந்த விருதை வென்றுள்ளார்.

ஒரு கதாபாத்திரத்தை வெறுமனே நடித்துக் காட்டாமல், அதன் உணர்வுகளையும் தன்மையையும் உள்வாங்கி இயல்பாக வெளிப்படுத்துவது சமுத்திரக்கனியின் தனிச்சிறப்பு. கதாபாத்திரங்களும் மொழிகளும் மாறினாலும், அவரது நடிப்பின் தனித்துவம் தொடர்ந்து நிலைத்து நிற்கிறது.

இந்த அங்கீகாரத்தை வழங்கிய SIIMA குழுவினருக்கும், நடுவர் குழுவினருக்கும் சமுத்திரக்கனி தனது மனமார்ந்த நன்றியைத் தெரிவித்துள்ளார். மேலும், ‘காந்தா’ படத்தின் இயக்குநர் செல்வமணி செல்வராஜ், தயாரிப்பாளர்கள் ராணா டகுபதி, துல்கர் சல்மான், பிரசாந்த் பொட்லூரி, ஜோம் வர்கீஸ் மற்றும் ஒட்டுமொத்த படக்குழுவினருக்கும் தனது நன்றியைத் தெரிவித்துள்ளார்.

நடிப்பில் தொடர்ந்து பல்வேறு மொழிகளில் பயணித்து வரும் சமுத்திரக்கனி, வெற்றிமாறன் இயக்கத்தில் சிம்பு நடிக்கும் ‘அரசன்’, மற்றும் ராஜன் வகையறா , முத்தையா இயக்கத்தில் அருண் விஜய் நடிக்கும் ‘இருளன்’, ராஷ்மிகா மந்தனா நடிக்கும் ‘மைசா’, பூஜா அபர்ணா கொல்லூரு இயக்கத்தில் அக்ஷய் கண்ணா நடிக்கும் ‘மகாகாளி’, மன்சு மனோஜ் உடன் டேவிட் ரெட்டி மற்றும் கோபிசந்த் மாலினேனி இயக்கத்தில் நந்தமூரி பாலகிருஷ்ணா நடிக்கும் ‘NBK 111’ உள்ளிட்ட பல்வேறு படங்களில் முக்கிய கதாபாத்திரங்களில் நடித்து வருகிறார்.

மேலும், பிரசாந்த் வர்மா இயக்கத்தில் உருவாகி வரும் ‘ஜெய் ஹனுமான்’ திரைப்படத்தில் ரிஷப் ஷெட்டி கதாநாயகனாக நடிக்க, சமுத்திரக்கனி முக்கிய கதாபாத்திரத்தில் நடித்து வருகின்றார் அதேபோல், பிரசாந்த் வர்மாவின் சினிமாட்டிக் யூனிவர்ஸில் உருவாகும் ‘மகாகாளி’ திரைப்படத்திலும் சமுத்திரக்கனி முக்கிய கதாபாத்திரத்தில் நடித்து வருகிறார்.

இதனிடையே, சமுத்திரக்கனி இயக்கி நடிக்கும் ‘School Bus’ திரைப்படத்தில் சசிகுமார்,கிச்சா சுதீப் , மிஷ்கின் முக்கிய கதாபாத்திரத்தில் நடிக்கிறார். கன்னடம் மற்றும் தெலுங்கில் ஏற்கனவே வெளியான அறிவிப்பைத் தொடர்ந்து, தமிழிலும் ‘School Bus’ திரைப்படம் குறித்த பிரம்மாண்டமான அறிவிப்பு விரைவில் வெளியாக உள்ளது.

சினிமா தமிழ்நாடு தொழில்நுட்பம்நிகழ்ச்சிகள்

Namadhu Arasu September 17, 2026September 17, 2026 kamalhasan, MOVIE, mssubbulakshmi, Tamilnadu

எம். எஸ். சுப்புலட்சுமி பயோபிக் (திரைப்படம்) தொடக்க விழா…

எம். எஸ். சுப்புலட்சுமி பயோபிக் (திரைப்படம்) தொடக்க விழா
(செப்டம்பர் 16, 2026) பாரத ரத்னா எம். எஸ். சுப்புலட்சுமி அவர்களின் 110-வது பிறந்தநாளை முன்னிட்டு இரண்டு முக்கியமான பெரிய நிகழ்ச்சிகள் நடைபெற்றன:
சென்னையிலுள்ள மியூசிக் அகாடமியில் (Music Academy, Chennai) எம். எஸ். சுப்புலட்சுமி அம்மாவின் வாழ்க்கை வரலாற்றை மையமாகக் கொண்ட “M.S. – A Legacy On Screen” என்ற திரைப்படத்தின் அதிகாரப்பூர்வ தொடக்க விழா நடைபெற்றது.முக்கிய விருந்தினர்: உலகநாயகன் கமல்ஹாசன் இந்த விழாவில் முதன்மை விருந்தினராகக் கலந்துகொண்டு, திரைப்படத்தின் முதல் காட்சிக்கான க்ளாப் அடித்து தொடங்கி வைத்தார்.நாயகி: இந்தத் திரைப்படத்தில் எம். எஸ். சுப்புலட்சுமி அம்மாவின் கதாபாத்திரத்தில் நடிகை ராஷ்மிகா மந்தனா நடிக்கிறார். நேற்று நடந்த விழாவில் அவர் தமிழில் பேசி தனது நன்றியையும், இந்த பாத்திரத்தில் நடிப்பது தனக்கு கிடைத்த பெருமை என்றும் கூறினார்.இயக்குநர் மற்றும் இசையமைப்பாளர்: இந்தத் திரைப்படத்தை கௌதம் தின்னனூரி இயக்குகிறார், அனிருத் ரவிச்சந்தர் இசையமைக்கிறார். அல்லு அரவிந்த், ராக்லைன் வெங்கடேஷ் மற்றும் பன்னி வாசு ஆகியோர் இணைந்து தயாரிக்கின்றனர்.
இவ்விழாவில் சிறப்பு விருந்தினராகக் கலந்துகொண்டு பேசிய மூத்த நடிகர் கமல்ஹாசன், “எம்.எஸ். சுப்புலட்சுமி ஒரு மிகச்சிறந்த ஆளுமையாகவும், இந்தியா முழுவதும் அறியப்பட்ட ஒரு நட்சத்திரமாகவும் திகழ்ந்தவர். தனது இசையின் மூலம் இந்தியாவை ஒன்றிணைக்கும் சக்தியாக அவர் விளங்கினார். பல மொழிகளில் பாடிய அவர், அனைத்து மொழிகளிலும் மிகச்சரியான உச்சரிப்பைக் கொண்டிருந்தார்,” என்று குறிப்பிட்டார்.தனது பிரபலமான திரைப்படமான ‘ஹே ராம்’ பணிகளில் ஈடுபட்டிருந்தபோது, அவரது இசையைக் கேட்டு ரசித்ததையும், இறுதியில் அவரை நேரில் சந்தித்ததையும் கமல்ஹாசன் நினைவு கூர்ந்தார். “‘ஹே ராம்’ படத்திற்காக ‘வைஷ்ணவ ஜனதோ’ பாடலை அவர் பாட வேண்டும் என்று நான் விரும்பினேன்; ஆனால் அப்போது அவருக்கு உடல்நலக்குறைவு ஏற்பட்டிருந்தது. எம்.எஸ். சுப்புலட்சுமி, டி.கே. பட்டம்மாள் மற்றும் எம்.எல். வசந்தகுமாரி போன்ற ஜாம்பவான்களுடன் நெருங்கிப் பழகும் வாய்ப்பைப் பெற்றது நான் பெற்ற பெரும் பாக்கியமாகக் கருதுகிறேன்,” என்று அந்த நடிகரும் தயாரிப்பாளருமான அவர் மேலும் கூறினார்.
இந்நிகழ்ச்சியில், ‘தி இந்தியன் கோரல் என்செம்பிள்’ (The Indian Choral Ensemble) குழுவினர் அந்தப் பாடகியின் பாடல்களை நேரலையில் இசைத்து வழங்கினர். “எம்.எஸ். அம்மாவின் வாழ்க்கையில் உள்ள மனிதநேயம் சார்ந்த பரிமாணத்தை நாங்கள் வெளிப்படுத்த விரும்புகிறோம். ‘லைக்’கள் (likes) மற்றும் ‘ஷேர்’கள் (shares) மூலம் வெற்றி அளவிடப்படும் இந்தக் காலத்தில் நாம் வாழ்கிறோம்; ஆனால், எம்.எஸ். அம்மாவின் மகத்துவம் என்பது அவரது அசைக்க முடியாத ஒழுக்கத்தால் உருவானது. இது இளம் தலைமுறைக்கு ஒரு வலுவான செய்தியாக அமையும்,” என்று இயக்குனர் கௌதம் கூறினார். இவர் நானியின் ‘ஜெர்சி’ மற்றும் விஜய் தேவரகொண்டாவின் ‘கிங்டம்’ போன்ற தெலுங்குப் படங்களுக்காக அறியப்படுபவர்.

மேலும் கௌதம் கூறுகையில், “கடந்த ஓராண்டாக நாங்கள் இந்தப் பணிக்காக உழைத்து வருகிறோம். எம்.எஸ். சுப்புலட்சுமி அம்மாவின் கதையை ஆழமாக ஆராய்ந்தபோது, உலகம் ஏற்கனவே அறிந்த விஷயங்களைத் தாண்டி, பல அழகான அம்சங்களை நாங்கள் கண்டறிந்தோம்,” என்று குறிப்பிட்டார்.நிகஷ்ச்சியில் கர்நாடக இசை கலைஞர்கள் மற்றும் திரைத்துறையினர் கலந்துகொண்டனர்
நிகஷ்ச்சிகளுக்கிடையே கர்நாடக இசையை இசை கலைஞர்கள் பாடினார்கள்
பெங்களூரு சௌடையா நினைவு மண்டபத்தில் (Chowdiah Memorial Hall) எம்.எஸ். சுப்புலட்சுமி அம்மாவின் நினைவாக ஒரு பிரம்மாண்ட இசை நிகழ்ச்சி நடைபெற்றது.நிர்மலா சீதாராமன் கண்கலக்கம்: இந்த விழாவில் மத்திய நிதியமைச்சர் நிர்மலா சீதாராமன் முதன்மை விருந்தினராகக் கலந்துகொண்டார்.மேடையில் எம்.எஸ். சுப்புலட்சுமியின் கொள்ளுப் பேத்திகளான எஸ். ஐஸ்வர்யா மற்றும் எஸ். சௌந்தர்யா ஆகியோர் “மைத்ரீம் பஜத” (Maithreem Bhajatha) பாடலைப் பாடியபோது, அதைக் கேட்டு உணர்ச்சிவசப்பட்ட நிதியமைச்சர் நிர்மலா சீதாராமன் மேடையிலேயே கண்ணீர் விட்டு அழுதார்.

TVK அரசியல்தமிழ்நாடு தொழில்நுட்பம்நிகழ்ச்சிகள்வணிகம்

Namadhu Arasu September 15, 2026September 15, 2026 cmvijay, investments, london, Tamilnadu

முதலமைச்சர் விஜய் ரூ. 12,300 கோடி முதலீடு ஈர்ப்பு… நிறுவனங்களின் விவரங்கள்

முதலமைச்சர் விஜய், லண்டனில் இதுவரை ரூ. 12,300 கோடி முதலீட்டில் சுமார் 9,400 பேருக்கு வேலை வாய்ப்பு உருவாக்கும் வகையில் புரிந்துணர்வு ஒப்பந்தங்கள் கையெழுத்திட்டிருப்பதாக தமிழ்நாடு அரசு தெரிவித்துள்ளது.
தமிழ்நாட்டிற்கு முதலீடுகளை ஈர்க்கவும், லண்டனில் நடைபெற்ற நடிகரும், ரேஸருமான அஜித்குமாரின் கார் பந்தயத்தைத் தொடங்கி வைக்கவும், முதலமைச்சர் விஜய் கடந்த 10ஆம் தேதி சென்னையில் இருந்து லண்டன் புறப்பட்டுச் சென்றார்.
இதனைத் தொடர்ந்து கடந்த 12ஆம் தேதி லண்டனில், அஜித் குமார் பங்கேற்ற கார் பந்தயத்தை முதலமைச்சர் விஜய் கொடி அசைத்து தொடங்கிவைத்தார். இதனைத் தொடர்ந்து அரசியல் கட்சித் தலைவர்கள் லண்டன் பயணம் குறித்தும், முதலீடுகள் குறித்தும் கேள்வி எழுப்பிவந்தனர்.
இங்கிலாந்து, இலண்டன் நகரில் இன்று (14.09.2026), சம்வர்தனா மதர்சன் இன்டர்நேஷனல் லிமிடெட் (Samvardhana Motherson International Ltd.,) நிறுவனம் அதன் ஐரோப்பா மற்றும் இங்கிலாந்தைச் சேர்ந்த கூட்டு நிறுவனங்களுடன் இணைந்து, வழிகாட்டி நிறுவனத்துடன் தமிழ்நாட்டில் சுமார் ரூ.11,000 கோடி முதலீட்டில், வடிவமைப்பு, பொறியியல், உற்பத்தி, கூட்டிணைப்பு (Assembly) மற்றும் தளவாட வசதிகள் ஆகிய துறைகளில் சுமார் 7,000 நபர்களுக்கு வேலைவாய்ப்புகள் உருவாக்கிடும் வகையில் புரிந்துணர்வு ஒப்பந்தம் மேற்கொள்ளப்பட்டது.

இப்புரிந்துணர்வு ஒப்பந்தத்தில், சம்வர்தனா மதர்சன் இன்டர்நேஷனல் குழுமத்தின் உலகளாவிய சந்தைப்படுத்தல் மற்றும் தகவல் தொடர்புத் துறைத் தலைவர் திரு.பாரி பெயிண்டர் மற்றும் தமிழ்நாடு அரசின் வழிகாட்டி நிறுவனத்தின் நிர்வாக இயக்குநர் திரு.தீபக் ஜேக்கப், இ.ஆ.ப. ஆகியோர் கையெழுத்திட்டு, ஒப்பந்தத்தைப் பரிமாறிக் கொண்டனர்.

இந்நிகழ்ச்சியில், இங்கிலாந்து நாட்டிற்கான இந்தியத் தூதர் திரு.குமரன் பெரியசாமி, IFS, நிறுவனப் பிரதிநிதிகள் மற்றும் அரசு உயர் அலுவலர்கள் கலந்துகொண்டனர்.
மொத்தம் ரூ. 12,300 கோடி மதிப்பிலான முதலீடுகளை தமிழ்நாட்டிற்கு ஈர்ப்பதற்காக புரிந்துணர்வு ஒப்பந்தம் கையெழுத்திடப்பட்டிருப்பதாக தமிழ்நாடு அரசு தெரிவித்துள்ளது. தமிழ்நாடு அரசு முதலமைச்சர் அலுவலகம் வெளியிட்டுள்ள எக்ஸ் பதிவுகளில், சம்வர்தனா மதர்சன் இன்டர்நேஷனல் லிமிடெட் நிறுவனம் தமிழ்நாட்டில் ரூ. 11 ஆயிரம் கோடி முதலீடு செய்து, 7 ஆயிரம் பேருக்கு வேலைவாய்ப்பு வழங்கும் வகையில் புரிந்துணர்வு ஒப்பந்தம் கையெழுத்தானது.
தமிழ்நாட்டில் உலகளாவிய திறன் மையங்களை (Global Capability Centres – GCCs) விரிவுபடுத்துவதற்கும், நிறுவுவதற்கும் இரண்டு புரிந்துணர்வு ஒப்பந்தங்கள் கையெழுத்திடப்பட்டன.

இங்கிலாந்தை தலைமையிடமாகக் கொண்ட முன்னணி உலகளாவிய தகவல் தொடர்பு நிறுவனம் ஒன்று, தமிழ்நாட்டில் உலகளாவிய திறன் மையத்தை (GCC) அமைப்பதற்கு ஏதுவாக, தமிழ்நாடு அரசின் வழிகாட்டி நிறுவனம், ஏர்ன்ஸ்ட் & யங் (Ernst & Young) நிறுவனத்துடன் புரிந்துணர்வு ஒப்பந்தம் ஒன்றை மேற்கொண்டது. சுமார் 1,000 கோடி ரூபாய் முதலீட்டையும், 2,000-க்கும் மேற்பட்ட உயர் மதிப்புடைய புதிய வேலைவாய்ப்புகளையும் உருவாக்கும் வகையில் அமையவுள்ள இந்த மையம், சென்னையில் உள்ள மவுண்ட் பூந்தமல்லி சாலையில் புதிதாக அறிவிக்கப்பட்ட ‘GCC காரிடார்’ (GCC corridor) பகுதியில் அமைக்கப்படவுள்ளது.

ஸ்வீடனைச் சேர்ந்த சிக்மா டெக்னாலஜி குரூப், தமிழ்நாட்டில் எம்பெடட் சிஸ்டம்ஸ், மின்மயமாக்கல் மற்றும் தொழில்துறை டிஜிட்டல்மயமாக்கல் ஆகிய துறைகளில் 600 உயர் மதிப்பு வேலைவாய்ப்புகளை உருவாக்கும் நோக்கில், திருச்சிராப்பள்ளி மற்றும் சென்னையில் உள்ள தனது உலகளாவிய திறன் மையங்களை, தனது இந்திய நிறுவனமான ஸ்ரியா சொல்யூஷன்ஸ் மூலம் விரிவாக்குவதற்கு உறுதியளித்து, தமிழ்நாடு அரசின் வழிகாட்டி நிறுவனத்துடன் புரிந்துணர்வு ஒப்பந்தத்தில் கையெழுத்திட்டுள்ளது.

மாண்புமிகு தமிழ்நாடு முதலமைச்சர் திரு.ச.ஜோசப் விஜய் அவர்கள் முன்னிலையில், சிக்மா டெக்னாலஜி குரூப் (Sigma Technology Group) நிறுவனத்தின் நிறுவனர் மற்றும் தலைமை நிர்வாக அதிகாரி திரு. மைக்கேல் கார்ல்சன் மற்றும் திரு.கிருஷ்ணா ராதாகிருஷ்ணன், தலைமை நிர்வாக அதிகாரி, ஸ்ரியா (Sigma AB Pvt Ltd-இன் ஒரு பகுதி)மற்றும் தமிழ்நாடு அரசின் வழிகாட்டி (Guidance) நிறுவனத்தின் நிர்வாக இயக்குநர் திரு. தீபக் ஜேக்கப், IAS ஆகியோருக்கு இடையே புரிந்துணர்வு ஒப்பந்தம் பரிமாறிக் கொள்ளப்பட்டது.

இந்நிகழ்ச்சியில், இங்கிலாந்து நாட்டிற்கான இந்திய தூதர் திரு. குமரன் பெரியசாமி, IFS, நிறுவனப் பிரதிநிதிகள் மற்றும் அரசு உயர் அலுவலர்கள் கலந்துகொண்டனர்.
ரூ. 1,000 கோடி மதிப்பில் 2,000க்கும் மேற்பட்ட உயர் மதிப்புடைய வேலைவாய்ப்புகள் கிடைக்கும் வகையில், ஏர்ன்ஸ்ட் & யங் நிறுவனத்துடன் புரிந்துணர்வு ஒப்பந்தம் கையெழுத்தானது.

சினிமா தமிழ்நாடு

Namadhu Arasu September 11, 2026September 11, 2026 mandaadi, soori, tamilfilm, Tamilnadu

மண்டாடி திரை விமர்சனம்

சென்னையில் வசிக்கும் காளி என்கிற சூரி ஒரு நீச்சல் குள கம்பெனியில் வேலை பார்க்கிறார்…எந்த விளையாட்டு வேண்டாம் என்று ஒதுங்கி வாழ்ந்து வந்தாரோ.. அது அவரை விட மறுக்கிறது,எதிர்பாராத சூழலால் சொந்த ஊருக்கு திரும்பிச் செல்கிறார்…ஊரில் நடத்தும் அந்த பாய்மர போட்டியில் ஜெயித்தாரா இல்லையா என்பதுதான் கதை .பாய்மர படகுப் போட்டியில் கலந்து கொண்டு வெல்வதில் வல்லவர் காளி(சூரி). அவருக்கும், சட்டபுலிக்கும்(சுஹாஸ்) பயிற்சி அளித்தவர் சத்யராஜ். காளியும், சட்டபுலியும் நண்பர்களாக இருக்கிறார்கள். சில பிரச்சனைகளால் ராமநாதபுரத்தில் இருந்து கிளம்பி சென்னைக்கு செல்கிறார் காளி. பிறந்து வளர்ந்த ஊரை விட்டு நெடுந்தூரம் வந்து வேலை வேலை என்று ஓடிக் கொண்டிருக்கிறார்.

அந்த சமயத்தில் தன் முன்னாள் காதலியின் மகனை காப்பாற்ற சொந்த ஊருக்கு திரும்பி வருகிறார் காளி. பாய்மர படகுப் போட்டியே வேண்டாம் சாமி என இருந்த காளி தற்போது தவிர்க்க முடியாத சூழ்நிலையால் அந்த போட்டியில் கலந்து கொள்கிறார். அதில் காளியுடன் மோதுவது வேறு யாரும் அல்ல அவரின் நண்பராக இருந்த சட்டபுலி தான். காளிக்கும், சட்டபுலிக்கும் இடையே விரோதம் எப்படி வந்தது, ஏன் இப்படி மோதிக் கொள்கிறார்கள் , யாருக்கு வெற்றி கிடைத்தது என்பதே மண்டாடி படத்தின் கதை ஆகும்.மண்டாடிக்கு தன் இசை மூலம் பெரும் பலம் கொடுத்திருக்கிறார் ஜி.வி. பிரகாஷ் குமார். கதாபாத்திர தேர்வை சரியாக செய்து அவர்கள் மூலம் நம்மை திருப்தி அடைய செய்திருக்கிறார் இயக்குநர் மதிமாறன் புகழேந்தி.வசனங்கள் அனல் தெறிக்கிறது…
அது காதல் காட்சிகளாயிருக்கட்டும், மற்ற மோதல் காட்சிகளும் சரி …
கதையில் இயக்குனர் வாழ்ந்திருக்கிறார்….சூரியின் நடிப்பு அபாரம் …
மண்டாடி… கொண்டாடி மகிழலாம் …kk

TVK அரசியல்இந்தியா சினிமா நிகழ்ச்சிகள்

Namadhu Arasu September 11, 2026September 11, 2026 cmvijay, london, Tamilnadu, travel

முதலீடுகளை பெற லண்டன் சென்றார்முதல்வர் விஜய்….

தமிழ்நாட்டிற்குப் புதிய தொழில் முதலீடுகளை ஈர்க்கும் நோக்கில், மாண்புமிகு தமிழ்நாடு முதலமைச்சர் திரு. ச. ஜோசப் விஜய் அவர்கள் 8 நாட்கள் அரசுமுறைப் பயணமாக இன்று (செப்டம்பர் 10) இங்கிலாந்து புறப்பட்டுச் சென்றார்.

புதிய அரசு பொறுப்பேற்ற 100 நாட்களுக்குள், ‘வெற்றித் தமிழ்நாடு முதலீட்டாளர்கள் மாநாடு 2026 வழியாக 1 லட்சம் கோடி ரூபாய்க்கும் அதிகமான முதலீட்டு ஒப்பந்தங்கள் கையெழுத்தாகி சாதனை படைக்கப்பட்டுள்ளதாக அரசு வெளியிட்டுள்ள செய்திக்குறிப்பில் தெரிவிக்கப்பட்டுள்ளது. இதன் தொடர்ச்சியாக, ஐரோப்பிய பன்னாட்டு நிறுவனங்கள் மூலம் மேலும் சுமார் 8,491 கோடி ரூபாய் முதலீடுகளை ஈர்க்கவும், அதன்வழியாக தமிழகத்தைச் சேர்ந்த 5,690 பேருக்கு புதிய உயர்தர வேலைவாய்ப்புகளை உருவாக்கவும் இந்த இங்கிலாந்து பயணம் திட்டமிடப்பட்டுள்ளது.
பிரிட்டன் நிறுவனங்கள் மூலம் ₹8,491 கோடி முதலீடு, 5,690 வேலைவாய்ப்புகள் மற்றும் உலகத்தரம் வாய்ந்த ‘மோட்டார் ஸ்போர்ட்ஸ் நகரம்’ அமைக்க முதலமைச்சர் விஜய் இங்கிலாந்து பயணம் மேற்கொண்டுள்ளார்.
ர்வதேச வர்த்தகத்தில் தமிழகத்தின் முதலிடம்
கடந்த ஜூலை 15, 2026 அன்று நடைமுறைக்கு வந்த ‘இந்தியா-பிரிட்டன் விரிவான பொருளாதார மற்றும் வர்த்தக ஒப்பந்தத்தை’ (CETA) மிகச் சரியாகப் பயன்படுத்தியதில் தமிழ்நாடு முன்னணியில் உள்ளது. ஒப்பந்தம் அமலான முதல் நாளிலேயே சென்னையிலிருந்து பிரிட்டனுக்கு ஏற்றுமதிப் பொருட்கள் அனுப்பி வைக்கப்பட்டு, சர்வதேச வர்த்தகத்தில் தமிழகம் முன்னோடி மாநிலமாகத் திகழ்வது குறிப்பிடத்தக்கது.

தமிழகத்தில் உலகத்தரம் வாய்ந்த மோட்டார் ஸ்போர்ட்ஸ் நகரம்
சட்டப்பேரவை விதி 110-ன்கீழ் தமிழ்நாட்டில் உலகத்தரம் வாய்ந்த ‘மோட்டார் ஸ்போர்ட்ஸ் நகரம்’ (Motor Sports City) அமைக்கப்படும் என்று முதலமைச்சர் ஏற்கனவே அறிவித்திருந்தார். இந்த அறிவிப்பைச் செயலாக்கும் விதமாக, உலகின் புகழ்பெற்ற லண்டன் ‘சில்வர்ஸ்டோன் மோட்டார் ரேசிங் சர்க்யூட்’ வளாகத்திற்கு முதலமைச்சர் நேரில் செல்லவிருக்கிறார். அங்குள்ள பாரம்பரிய வடிவமைப்பு, நவீன பாதுகாப்பு வசதிகள் மற்றும் விளையாட்டு சுற்றுலா சார்ந்த வணிக நடைமுறைகளை அவர் நேரில் பார்வையிட்டு ஆய்வு செய்ய உள்ளார்.

முதலமைச்சருடன் பயணிக்கும் உயர்மட்டக் குழு
இன்று சென்னையிலிருந்து புறப்பட்ட இந்த உயர்மட்டக் குழுவில், பொதுப்பணிகள் மற்றும் விளையாட்டு மேம்பாட்டுத் துறை அமைச்சர் திரு. ஆதவ் அர்ஜுனா, SDAT உறுப்பினர் செயலர் திரு. மேகநாத ரெட்டி (இ.ஆ.ப), தொழில் துறை வழிகாட்டி நிறுவனத்தின் (Guidance) சி.இ.ஓ திரு. தீபக் ஜேக்கப் (இ.ஆ.ப) மற்றும் அரசு உயர் அதிகாரிகள் இடம்பெற்றுள்ளனர். இங்கிலாந்து பயணத்தை வெற்றிகரமாக முடித்துக் கொண்டு இக்குழுவினர் செப்டம்பர் 17 அன்று சென்னை திரும்புவர் என்று எதிர்பார்க்கப்படுகிறது

TNchiefsecretary அரசியல்தமிழ்நாடு நிகழ்ச்சிகள்

Namadhu Arasu September 8, 2026September 8, 2026 cmvijay, Tamilnadu, TNassembly

8 துறைகள் கோரிக்கை மீதான பதில் உரை-சட்டசபை இன்றுடன் நிறைவடைகிறது….

தமிழ்நாடு சட்டப்பேரவையின் பட்ஜெட் கூட்டத்தொடர் இன்றுடன் நிறைவடைகிறது. கூட்டத்தொடரின் இறுதி நாளான இன்று வினாக்கள் – விடைகள் நேரம் கிடையாது என்றும், 8 துறைகளின் மானியக் கோரிக்கைகள் மீது விவாதம் நடைபெற்று அமைச்சர்கள் பதிலுரை அளிக்கவுள்ளனர் என்றும் அறிவிக்கப்பட்டுள்ளது.
ஜே.சி.டி பிரபாகர் அவையில் ஆற்றிய உரையில், இன்று மிகவும் முக்கியமான நாள்; கூட்டத்தொடரின் இறுதி நாள் என்பது நாம் அனைவரும் அறிந்ததே. இன்றைய அமர்வில் 8 மானியக் கோரிக்கைகள் மீது விவாதம் நடைபெற உள்ளது. இத்தனை நாட்களாக சட்டமன்ற உறுப்பினர்கள் மிகவும் பொறுமையாகவும், நிதானமாகவும், உடல் உபாதைகள் பொறுத்துக்கொண்டும் சகித்துக்கொண்டும், இரவு 7, 8 மணி ஆனாலும் கூட ஜனநாயகக் கடமையைச் செம்மையாக நிறைவேற்ற வேண்டும் என்ற நோக்கில் மிகச் சிறந்த ஒத்துழைப்பைத் தந்தீர்கள்.

இருப்பினும், பேரவை விதி 185-ன் படி, மானியக் கோரிக்கைகளின் வாக்கெடுப்பிற்கு ஒதுக்கப்பட்ட நாட்களின் கடைசி நாளன்று பிற்பகல் 1:30 மணிக்கு மானியத்தைக் குறைக்கக் கோரும் தீர்மானம் எதுவும் விவாதத்தில் இருப்பின், அதையும் சேர்த்து நிலுவையிலுள்ள மானியக் கோரிக்கைகள் அனைத்தையும் முடிவுக்குக் கொண்டுவர அவசியமான பிரச்னை ஒவ்வொன்றையும் பேரவைத் தலைவர் உடனடியாக வாக்கெடுப்பிற்கு விட வேண்டும் என்ற விதி உள்ளது. மானியக் கோரிக்கைகள் மீது எத்தனை பேர் பேசினாலும், ஆங்கிலத்தில் ‘கில்லட்டின்’ (Guillotine) என்று குறிப்பிடப்படும் நடைமுறைப்படி, பிற்பகல் 1:30 மணிக்குள் அவற்றை முழு நிறைவு பெறச் செய்ய வேண்டும்.
ஒவ்வொரு கட்சிக்கும் தலா 3 பேர் பேச வாய்ப்பு வழங்கப்பட்டு வருகிறது. ஆனால், இன்றைய தினம் அனைத்துக் கட்சிகளிலிருந்தும் தலா 3 பேர் பேசத் தொடங்கினால் 1:30 மணிக்குள் கூட்டத்தை முடிக்க இயலாது; விதிகளுக்கு முரண்பாடாக அமைந்து மானியக் கோரிக்கைகள் ஏற்கப்படாத நிலைகூட ஏற்பட்டுவிடும். பிற்பகல் 1:30 மணிக்குள் மானியக் கோரிக்கைகள் அனைத்தும் நிறைவேற்றப்பட்டால்தான் அவை முறையாக நிறைவேறியதாகக் கருதப்படும். எனவே, அவையின் அலுவல்களை விரைவாக முடிப்பதற்கு அனைத்து மாமன்ற உறுப்பினர்களும் முழு ஒத்துழைப்பு அளிக்க வேண்டும் என்று அவர் கேட்டுக்கொண்டார். தொடர்ந்து, விவாதங்களுக்குப் பிறகு சம்பந்தப்பட்ட துறைகளின் அமைச்சர்கள் பதிலுரை வழங்கவுள்ளனர்.

TVK அரசியல்தமிழ்நாடு நிகழ்ச்சிகள்

Namadhu Arasu September 8, 2026September 8, 2026 cmvijay, Tamilnadu, TNassembly

சர்க்காரியா கமிஷன், அமலாக்கத் துறை அறிக்கைகளை சுட்டிக்காட்டி திமுக மீது சரமாரி குற்றச்சாட்டு-முதல்வர் விஜய்

தமிழக சட்டப்பேரவை 3 நாட்கள் விடுமுறைக்குப் பிறகு நேற்று மீண்டும் கூடியது. காவல் துறை மானியக் கோரிக்கை மீதான விவாதத்துக்கு பதில் அளித்து முதல்வர் விஜய் பேசியதாவது: கடந்த வாரம் நான் பேசும்போது, ‘‘என் மேஜையில் 3 துறை சார்ந்த கோப்புகள் உள்ளன. அதை திறக்க வேண்டிய நேரத்தில் திறப்போம்’’ என்று கூறினேன். ‘‘இப்போதே திறங்கள்’’ என்று எதிர்க்கட்சியினர் தெரிவித்தனர்.

1970-களில் திமுக ஆட்சியில் வீராணம் திட்ட குழாய் தயாரிக்க டெண்டர் வழங்கிய விவகாரம் குறித்து ‘சர்க்காரியா கமிஷன்’ அறிக்கையில் கூறப்பட்டுள்ளது. கடந்த 2001-ல் முன்னாள் முதல்வர் ஜெயலலிதா, முன்னாள் அமைச்சர் பொன்னையன் இதே சர்க்காரியா கமிஷன் அறிக்கை குறித்து பேரவையில் பேசியுள்ளனர். சட்டப்பேரவையில் காவல் துறை மானியக் கோரிக்கைகள் மீதான விவாதத்துக்கு முதல்வர் விஜய் நேற்று பதில் அளித்தார். அப்போது, சர்க்காரியா கமிஷன் மற்றும் அமலாக்கத் துறையின் அறிக்கைகளை சுட்டிக்காட்டி திமுக மீது கடுமையாக குற்றம்சாட்டினார்.
பவள விழா கண்ட கட்சியின் பொன்விழா சாதனைதான் இந்த சர்க்காரியா கமிஷன் அறிக்கை. அதில் அப்போதைய முதல்வர் தனது அதிகாரத்தை தவறாக பயன்படுத்தியதாக தெரிவிக்கப்பட்டுள்ளது. நீங்கள் ஆதாரம் கேட்டால், சட்டப்பேரவை நூலகத்திலேயே சர்க்காரியா கமிஷன் புத்தகம் இருக்கிறது.
திமுகவுக்கு எப்போதும் ஒரு பழக்கம் உண்டு, ஆதாரத்தைப் பக்கத்திலேயே வைத்துக்கொண்டு மற்றவர்களிடம் போய் தேடுவார்கள். அப்படித்தான் நான் ‘பார்ட்டி ஃபண்ட்’ என்று சொன்னதும் ஆதாரம் கேட்டார்கள். ஆதாரம் பக்கத்திலேயேதான் இருக்கிறது.

திமுக ஆட்சியில் இருந்தபோது அமலாக்கத் துறை அளித்த 100 பக்க அறிக்கையில் நகராட்சி நிர்வாகத் துறையில் ஒப்பந்ததாரர்களிடம் இருந்து பார்ட்டி ஃபண்ட் என்ற பெயரில் 7.5 சதவீதம் முதல் 10 சதவீதம் வரை லஞ்சம் வசூலிக்கப்பட்டதாக தெரிவித்துள்ளது. இதன் நேரடிப் பயனாளிகளாக அப்போதைய முதல்வர் ஸ்டாலினும், துணை முதல்வர் உதயநிதி ஸ்டாலினும் இருந்துள்ளனர் என்று அறிக்கை கூறுகிறது.

இன்னொரு துறையின் அமைச்சராக இருந்த செந்தில் பாலாஜி தனது அதிகாரத்தை தவறாகப் பயன்படுத்தியதாகவும் கூறப்பட்டுள்ளது. டாஸ்மாக்கை கையில் வைத்திருந்த அமைச்சருடன் சேர்ந்து சில ஐஏஎஸ் அதிகாரிகளும் இதில் ஈடுபட்டுள்ளனர். அதில் ரத்தீஷ் என்பவர் ‘பவர் புரோக்கராக’ இருந்துள்ளார்.

அவரது உத்தரவுப்படி தான் டாஸ்மாக் மேலாண் இயக்குநராக இருந்த ஐஏஎஸ் அதிகாரியே செயல்பட்டார் என அமலாக்கத் துறை தெரிவிக்கிறது. இந்த அரசு வந்தவுடன் துபாயில் போய் ஒளிந்துகொண்டார். இவர் யாருக்கு நெருக்கமானவர்? யாருடைய அறிவுரைப்படி செயல்பட்டார்? கடவுளுக்குத்தான் வெளிச்சம்.

முன்னாள் அமைச்சர் செந்தில் பாலாஜியும் அவரது சகோதரர் அசோக் குமாரும் தங்கள் அதிகாரத்தை தவறாகப் பயன்படுத்தி டாஸ்மாக் பார்கள், போக்குவரத்து டெண்டர்கள், மின்வாரியப் பணிகளில் பெரும் முறைகேடுகள், சட்டவிரோதப் பணப் பரிவர்த்தனைகளிலும் ஈடுபட்டனர். இந்த 2 துறை கோப்புகளைத் திறந்ததற்கே இப்படி என்றால், மற்ற துறை கோப்புகளைத் திறந்தால் எத்தனை பூதம் கிளம்புமோ தெரியவில்லை.

திமுக இருக்கும் இடத்தில்தான் தப்பு நடக்கும். தப்பு நடக்கும் இடத்தில்தான் திமுக இருக்கும். திமுக என்னதான் அவதூறாகப் பேசினாலும் நாம் அவ்வளவு தரம்தாழ்ந்து பேசும் ரகம் கிடையாது. ஆனால், திமுகவின் போலி பிம்பத்தையும், பிராண்டையும் உடைப்போம்.

நான் இந்த நாற்காலிக்காகவோ, அதிகாரத்துக்காகவோ வரவில்லை. மக்களுக்கு உண்மையிலேயே நல்லது செய்ய வேண்டும். அவர்களுக்கு நன்றிக்கடன் செலுத்த வேண்டும் என்றுதான் வந்துள்ளேன். இவ்வாறு முதல்வர் பேசினார்.

57 நிமிடங்கள் ஆவேசம்: முதல்வர் பேசும்போது, ‘‘1967, 1977,1982, 2026.. அண்ணா, எம்ஜிஆர், என்டிஆர், விஜய். இறைவனும், இயற்கையும், மக்களும் நமது பக்கம்தான் எப்போதுமே இருப்பார்கள். அதனால் யார் என்ன முறைகேடுகள், என்ன வேலைகள் செய்தாலும் ஒன்றும் எடுபடாது. அந்த அன்புக்கு முன்னால் இவர்கள் தோற்பது உறுதி’’ என்றார்.

பேரவையில் முதல்வர் விஜய் நேற்று மொத்தம் 57 நிமிடங்கள் 42 விநாடிகள் பேசினார். பேச்சின் தொடக்கத்தில் பல்வேறு விஷயங்களை குறிப்பிட்ட அவர்,

சுமார் 15 நிமிடங்களுக்குப் பிறகு, திமுக ஆட்சியின் நிர்வாகம், செயல்பாடுகள் தொடர்பான குற்றச்சாட்டுகளை ஆவேசத்துடன் முன்வைத்தார்.

பேரவைக் கூட்டம் இன்று நிறைவு: தமிழகத்தில் அமைந்த 17-வது சட்டப் பேரவையின் முதல் பட்ஜெட் மற்றும் மானியக் கோரிக்கைக்கான கூட்டத்தொடர், ஆக.5-ம் தேதி தொடங்கியது. அன்று பொது பட்ஜெட், மறுநாள் 6-ம் தேதி வேளாண் பட்ஜெட் தாக்கல் செய்யப்பட்டன. பின்னர், அரசு விடுமுறை நாட்கள் தவிர்த்து ஆக.12 வரை பட்ஜெட் மீதான விவாதம் நடைபெற்று, அமைச்சர்கள் பதில் அளித்தனர்.

இதைத் தொடர்ந்து, துறை வாரியாக மானியக் கோரிக்கை மீதான விவாதம் ஆக.17-ல் தொடங்கியது. இன்று போக்குவரத்து, இயக்கூர்திகள் சட்டம் உள்ளிட்ட துறைகள் மீதான விவாதம் நடைபெறுகிறது. இன்றைய நிகழ்வுடன் பேரவை நிறைவு பெறுகிறது.

சினிமா தமிழ்நாடு

Namadhu Arasu September 8, 2026September 8, 2026 tamilcinema, Tamilnadu, trailer, yennavilai

‘என்ன விலை’ திரைப்படத்தின் டிரெய்லர் வெளியீட்டு விழா!..

தேசிய விருது பெற்ற திரைப்பட இயக்குநர் சஜீவ் பழூர் எழுதி இயக்கியுள்ள ‘என்ன விலை’ திரைப்படத்தை ஜித்தேஷ் விஸ்வம்பரன் மற்றும் அனுகோபால் வேணுகோபாலன் ஆகியோர் கலாமயா சினிவெர்ஸ் நிறுவனத்தின் சார்பில் தயாரித்துள்ளனர். இப்படத்தில் கருணாஸ், நிமிஷா சஜயன் உள்ளிட்டப் பலர் நடித்துள்ள இந்த திரைப்படம் செப்டம்பர் 17 ஆம் தேதி திரையரங்குகளில் வெளியாகிறது. இதன் டிரெய்லர் வெளியீட்டு விழா நடைபெற்றது.

தயாரிப்பாளர் ஜித்தேஷ் விஸ்வாம்பரன், “பல சிறிய விஷயங்களுக்கு இந்த படம் முன்னுதாரணமாக இருக்கும். படக்குழுவினரோடு ராமேஸ்வரம் மக்களும் கடுமையான உழைப்பு இந்த படத்திற்கு கொடுத்திருக்கிறார்கள். அதற்கான பலனை நீங்கள் தருவீர்கள் என்று நம்புகிறேன்”.

நடிகர் கான்ஸ்டபிள் சுந்தரம், “ஜூனியர் ஆர்ட்டிஸ்டாக இருந்த எனக்கு இந்த படத்தில் வாய்ப்பளித்த இயக்குநருக்கு நன்றி. நடிகர் கருணாஸ் பெரிய நடிகர் என்ற அலட்டல் இல்லாமல் எங்களிடம் இயல்பாக பழகினார். படம் நன்றாக வந்திருக்கிறது”.

நடிகர் பிரதீப், “இது ஒரு அருமையான படம். இதில் வாய்ப்பு கொடுத்த இயக்குநர், தயாரிப்பாளர், அண்ணன் கருணாஸூக்கு நன்றி. படம் வெற்றி பெற வேண்டி கொள்கிறேன்”.

நடிகர் தர்ஷன், “இந்தப் படத்தில் எனக்கு ரைட்டர் கேரக்டர். அனுப்பி வைத்த எல்லா விருது விழாக்களிலும் இந்தப் படம் விருது வென்றது. மிகச்சிறந்த வெற்றி படமாக இது மாற வேண்டும். அனைவரும் திரையரங்குகளில் வந்து படம் பாருங்கள். படக்குழுவினர் அனைவருக்கும் வாழ்த்துக்கள்”.

நடிகை நிரோஷா, “இந்தப் படத்தில் வாய்ப்பு கொடுத்த இயக்குநருக்கும் தயாரிப்பாளருக்கும் நன்றி. நடிப்பு என்று தெரியாமல் இயல்பானதாக இருக்க வேண்டும் என்று சொல்லிக் கொடுத்தார். உங்கள் அனைவரின் ஆதரவும் தேவை”.

நடிகர் கவி, “பல நாடுகளின் விருது விழாக்களில் இந்த படம் திரையிடப்பட்டு விருதுகளை அள்ளியது. எப்போது நம் நாட்டு மக்களுடன் இந்த படத்தை பார்க்க இருக்கிறோம் என்று ஆவலுடன் காத்திருந்தோம். மக்களுடன் இணைந்து இந்த படத்தை கொண்டாட இருக்கிறோம். முக்கியமான படத்தில் எனக்கு வாய்ப்பு அளித்த தயாரிப்பாளருக்கும் இயக்குநருக்கும் படக்குழுவினருக்கும் நன்றி”.

நடிகர் பாண்டி, “ரொம்ப நாள் இந்தப் படத்திற்காக காத்திருந்தோம். வாய்ப்பு கொடுத்த தயாரிப்பாளர், இயக்குநருக்கு நன்றி. ‘பசங்க’, ‘கோலி சோடா’ படங்களை தாண்டி பெயர் எடுக்க வேண்டும் என ஒவ்வொரு படத்திலும் எதிர்பார்த்தேன். அது இந்த படத்தில் நடக்கும் என நம்புகிறேன். உங்கள் அனைவரது ஆதரவும் தேவை”.

நடிகை சாஷா, “இயக்குநர் சஜீவ் சார், தயாரிப்பாளர் ஜித்தேஷ் சாருக்கு நன்றி. இந்த படத்தில் ஹீரோவின் தங்கை மணிமேகலை என்ற கதாபாத்திரத்தில் நடித்திருக்கிறேன். கிராமத்துக் கதையில் நடிக்க வேண்டும் என்ற எனது கனவு இந்த படம் மூலம் நிறைவேறி இருக்கிறது. ராமேஸ்வரத்தில் இந்த படம் படமாக்கப்பட்டுள்ளது. எல்லோருமே கஷ்டப்பட்டு உழைத்திருக்கிறோம். 13 விருது விழாக்களில் இந்த படம் விருது வென்று இருக்கிறது. எல்லோரும் திரையரங்குகளில் பார்த்துவிட்டு ஆதரவு கொடுங்கள்”.

இயக்குநர் சஜீவ் பழூர், ” ‘நடுவுல கொஞ்சம் பக்கத்த காணோம்’, ‘சூது கவ்வும்’, ‘பண்ணையாரும் பத்மினியும்’ போன்ற படங்கள் சின்ன கருவில் இருந்து கதையானது. தமிழ் எனக்கு மிகவும் பிடிக்கும் என்பதால் அதில் ‘என்ன விலை’ படத்தை இயக்கியுள்ளேன். படம் பார்த்துவிட்டு சொல்லுங்கள் “.

நடிகர் கருணாஸ், “கடந்த 2001 ஆம் ஆண்டு ராமேஸ்வரத்தில் பாலா அண்ணன் இயக்கத்தில் லொடுக்கு பாண்டியாக திரையுலகில் எனது பயணத்தை ஆரம்பித்தேன். நான் அதிகம் மலையாள படங்களை விரும்பி பார்ப்பேன். அதனால் மலையாள ரைட்டர், இயக்குநர்கள், டெக்னீஷியன்ஸ் உடன் இணைந்து ஒரு படமாவது பணிபுரிய ஆசைப்பட்டேன். அது இப்போது நடந்திருக்கிறது. இந்த படம் சாமானியர்களை பற்றியது. அதனால் தான் இயல்பான நடிகர்களை தேர்வு செய்துள்ளார். எனக்கு இன்று பெரிதாக வியாபாரம் இல்லை. இருந்தாலும் என்னை நம்பி ஏழு கோடி ரூபாய் தயாரிப்பாளர்கள் இந்த படத்தில் முதலீடு செய்திருக்கிறார்கள். அந்த அளவுக்கு அவர்களுக்கு கதை மீது நம்பிக்கை. இந்திய சினிமாவில் இதுவரை யாரும் எழுப்பாத ஒரு கேள்வியை இந்த படத்தில் இயக்குநர் சஜீவ் எழுப்பி இருக்கிறார். எனது இருபது ஆண்டு கால ஆசையை இந்த படம் நிறைவேற்றி இருக்கிறது.
அட்வகேட் கதாபாத்திரத்தில் நிமிஷா அற்புதமாக நடித்திருக்கிறார். எல்லா கதாபாத்திரங்களுக்கும் பொருத்தமானவர்களை இயக்குநர் திறமையாக தேர்வு செய்து இருக்கிறார். இந்த திரைப்படம் வெளியாவதற்கு முன்பே நெட்ஃபிலிக்ஸ் போன்ற முன்னணி ஓடிடி தளம் விலைக்கு வாங்கி இருப்பது மகிழ்ச்சி. ‘நந்தா’ படத்திற்கு பிறகு என் மனதிற்கு மிகவும் நெருக்கமான திரைப்படம் இது. இத்தனை ஆண்டுகால திரைப்பயணத்தில் என்னுடைய நடிப்பை பார்த்து என் மனைவி முதன் முதலாக இந்த படத்தில் தான் பாராட்டி இருக்கிறார். நிமிஷா மேடமும் என்னுடைய நடிப்பை பார்த்து சிலிர்த்து கட்டிப்பிடித்து கன்னத்தில் முத்தம் கொடுத்தார். நிச்சயம் இந்த படமும் என்னுடைய கதாபாத்திரமும் உங்கள் அனைவருக்கும் பிடிக்கும் என்று உறுதியாக நம்புகிறேன்” என்றார்.

சினிமா தமிழ்நாடு

Namadhu Arasu September 7, 2026September 7, 2026 immortal, jvprakash, tamilcinema, Tamilnadu

இம்மார்டல்-IMMORTAL- திரைப்பட விமர்சனம்….

ஜிவிபிரகாஷ் ஒரு அழகிய பெண்ணான மாயா காட்டுவிலங்கிடம் ஒரு அடுக்கு மாடி குடியிருப்பில் மாட்டிக்கொள்கிறார் …அதிலிருந்து தப்பிக்கிறாரா இல்லையா இதுதான் கதை…
திரைக்கதை புரிந்து கொள்ள சற்று நேரமாகிறது ; திரைப்பட இயக்குநர், தனது ஸ்டைலில் தனக்கு வசதியான ஒரு திரைக்கதையை கதாபாத்திரங்களைக் கொண்டு உருவாக்குகிறார். தன் மாமாவின் (லொள்ளு சபா மாறன்) அச்சகத்தில் பணிபுரியும் கதாநாயகன் மேகி ( ஜி.வி. பிரகாஷ் குமார்), ஒரு வீட்டைத் தேடுகிறான், குறிப்பாகப் பக்கத்து வீட்டில் ஒரு பெண் (ஹீரோயின் காயடு லோஹர்மிக மிக அழகாக காட்டியிருக்கிறார்கள்) இருக்கும் வீட்டை. எந்த லட்சியமும் இல்லாத, காமவெறி பிடித்த ஒரு இளைஞனாக ஜி.வி. பிரகாஷ் நடிப்பதை இன்னும் எத்தனை முறை பார்க்க வேண்டும் என்று நாம் யோசிக்கத் தொடங்குவதற்குள், மேகியில் அவனது கனவிலும் நினைத்துப் பார்க்காத ஒரு அழைப்பு வருகிறது – ஒரு பிரீமியம் பல மாடி குடியிருப்பில் வசிக்கும் சிந்து ( காயடு லோஹர் ) என்ற இளம் பெண்ணிடமிருந்து, தன்னுடன் வந்து தங்குவதற்கான ஒரு அழைப்பு.
வெளிப்படையாக, மேகி அந்த இடத்தையும் (அந்தப் பெண்ணையும்) பார்த்த உடனேயே சம்மதம் தெரிவிக்கிறான். ஆனால், அந்த இடத்தின் மிகச் சாதாரணமான விஷயங்களில்கூட ஏதோ தவறு இருக்கிறது என்பதை அவன் உணர்ந்துகொள்ளக் கொஞ்ச நேரம் ஆகிறது. உண்மையில் சிந்து யார்? முன்னுரையில் காட்டப்படும் 1,000 ஆண்டுகளுக்கு முந்தைய நிகழ்வுகளுக்கும் அவளுக்கும் என்ன தொடர்பு?
இம்மார்டல், திகில் படங்களின் வழக்கமான வார்ப்புருக்களின் ஒரு பாடப்புத்தகம் போல, கதாபாத்திரம் பேய் வீட்டில் சிக்கிக்கொண்டதைப் பற்றி நாம் கவலைப்படுகிறோம். ஏனென்றால், அந்தக் கதாபாத்திரம் நமக்கு யதார்த்தமான குணாதிசயங்கள், பிரச்சினைகள் மற்றும் உந்துதல்களுடன் சித்தரிக்கப்பட்டுள்ளது. இங்கே, மேகி மீது நமக்கு எந்த அக்கறையும் இல்லை; அவனது முழு ஆளுமையையும் ‘காமம் நிறைந்த ஒரு இளைஞன்’ என்று வரையறுக்க முடிவதால், அவனுக்கு அது தேவைதான் என்று மட்டுமே உணர்கிறோம்.
எதிர்பார்த்தபடியே, நடிப்புகள் ஓகே ; சுமாரான ஒவ்வொரு திரைக்கதையையும், திரைப்பட உருவாக்கத் தேர்வையும் காயடு லோஹரின் கவர்ச்சியை மட்டுமே நம்பி படக்குழுவினர் வைத்துள்ளனர். ‘இதயம் முரளி’ படத்தில் திறம்பட நடித்திருந்த அந்த நடிகை, கடுமையாக முயற்சி செய்கிறார், ஆனால் பலவீனமான திரைக்கதையும் (சாம் சி.எஸ். இசையமைத்த) வழக்கமான பின்னணி இசை
நேர்த்தியான ஒளிப்பதிவும் உயிரினங்களின் வடிவமைப்பும் மட்டுமே இப்படத்தில் உள்ள நேர்மறையான அம்சங்கள். எனவேதான், ‘இம்மார்டல்’ நம் மனதில் நிலைத்து நிற்கும் விஷயங்கள் மிகக் குறைவாகவே இருப்பதில் ஆச்சரியமில்லை.அனால் படத்தின் கதாநாயகி அனைவரின் மனதையும் கொள்ளை கொள்வர் என்பதில் ஐயமில்லை …மேடை நாடக நடிகர் கார்த்தியை காமெடி வேடங்களில் பார்த்துவிட்டு இந்த படத்தில் வித்தியாசமான கேரக்டர் கொடுத்து உள்ளார்கள் …ஆகா மொத்தத்தில் படத்தின் வேகம் குறைவாகவே உள்ளது

சினிமா தமிழ்நாடு

Namadhu Arasu September 7, 2026September 7, 2026 filmreview, tamilcinema, Tamilnadu

ஏன் என்னை ஏதோ செய்தாய்….திரை விமர்சனம்…..

சிறுவயதிலேயே தாயை இழந்த இளைஞன் ஒருவன் நகரத்திற்கு வந்து மதுவுக்கு அடிமையாகி தன் வாழ்க்கையில் எல்லாவிதமான கெட்ட பழக்கங்களுக்கும் அடிமையாகிஅந்த பழக்கத்தில் மூலம் ஒரு காதல்… உருவாகிறது ,அந்த காதலில் அவர் வெற்றியடைந்தாரா இல்லையா என்பதுதான் படம், இன்றைக்கு உள்ள உள்ள லைப் ஸ்டைலில் இளைஞர்கள் எப்படி பேச்சிலராக வாழ்கிறார்களோ அப்படி படம் முழுக்க இயல்பான டயலாக்,… படத்தில் எப்பொழுதுமே மயிறு மட்டை போன்ற கெட்ட வார்த்தைகள், பெண்கள் காதை பொத்திக் கொள்ளும் அளவிற்கு நாசரமாய் வசனங்கள்…. (இதெல்லாம் அந்த படத்திற்கு தேவை போல) டி ஆண்டனி இந்த படத்தை எழுதி இயக்கி நடித்து தயாரித்தும் உள்ளார், மதுமிதா தாஸ் கதாநாயகியாக ஜொலிக்கிறார் மற்றபடி படத்தில் சொல்லும் அளவுக்கு ஏதுமில்லை படத்தின் இசை நன்றாக உள்ளது… கதாநாயகன் படம் முழுக்க மதுவையும் சிகரெட்டையும் குடித்து தள்ளுகிறார்…
மிகக்குறைந்த பட்ஜெட்டில் எடுத்த படம் என்பதால் எங்கு பார்த்தாலும் எல்லாமே மிகவும் குறைவாக தெரிகிறது….. எதற்காக கதை இறுதியில் கதாநாயகி ஆக்சிடென்ட்டில் இறந்தார் என்று வைத்தார்கள்… என்று புரியவில்லை…. சோகமான கிளைமாக்ஸ் ஆக இருக்க வேண்டும் என்று நினைத்தார்களோ என்னவோ தெரியவில்லை….திரைப்படம் இன்று ரிலீஸ் ஆகிறது படத்தை இளைஞர்கள் எப்படி எடுத்துக் கொள்வார்கள் என்று தெரியவில்லை….என்னை ஏன் வச்சு செய்தாய் என்று என்ன தோன்றுகிறது….