India – Page 2 – Namadhu Arasu

2025-26-ல் உலகில் மிக வேகமாக வளரும் பொருளாதாரமாக இந்தியா உருவெடுத்துள்ளதாக பொருளாதார ஆய்வறிக்கையில் தெரிவிக்கப்பட்டுள்ளது.
2026-27 ஆம் நிதி ஆண்டுக்கான நிதிநிலை அறிக்கையை மத்திய நிதியமைச்சர் நிர்மலா சீதாராமன் நாளை மறுநாள் நாடாளுமன்றத்தில் தாக்கல் செய்ய உள்ளார். அதற்கு முன்பாக, 2025-26 நிதி ஆண்டின் பொருளாதார நிலை குறித்த ஆய்வறிக்கையை அவர் மக்களவையில் நேற்று தாக்கல் செய்தார்.
சர்வதேச அளவில் நிலவும் பொருளாதார ஸ்திரமின்மை, வர்த்தகம் சார்ந்த இடர்பாடுகள் என அனைத்தையும் கடந்து உலகின் வேகமாக வளரும் பெரிய பொருளாதாரம் என்ற இந்தியாவின் சாதனை தொடரும் என்று தெரிவிக்கப்பட்டுள்ளது
உள்நாட்டில் பொருள்கள், சேவையின் நுகர்வு, முதலீடு ஆகியவை சிறப்பாக உள்ளதாகவும், 2026-27 நிதியாண்டில் நாட்டின் பொருளாதார வளர்ச்சி 6.8 சதவீதம் முதல் 7.2 சதவீதம் வரை இருக்கும் என்றும் குறிப்பிடப்பட்டுள்ளது.
நாட்டில் பணவீக்கம் கட்டுக்குள் உள்ளதாக சுட்டிக்காட்டப்பட்டுள்ளது. அமெரிக்காவின் வரிவிதிப்பால் இந்திய ரூபாயின் மதிப்பு 5 சதவீதத்துக்கு மேல் குறைந்துள்ள போதிலும், இது நாட்டின் வலுவான பொருளாதாரக் கட்டமைப்பில் எவ்வித பாதிப்பையும் ஏற்படுத்தாது என்று கூறப்பட்டுள்ளது.
செயற்கை நுண்ணறிவு தொழில்நுட்ப வளர்ச்சி காரணமாக தரவு மையங்கள் பெருகி வருவது மற்றும் மின்சார தேவை அதிகரிப்பு காரணமாக உலகம் முழுவதும் காப்பர் தட்டுப்பாடு ஏற்படும் என்றும் பொருளாதார ஆய்வறிக்கையில் தெரிவிக்கப்பட்டுள்ளது.

அரசியல்இந்தியா தமிழ்நாடு தொழில்நுட்பம்நிகழ்ச்சிகள்

Namadhu Arasu January 21, 2026January 21, 2026 budget, financeminister, India, nirmalasitharaman

மத்திய பட்ஜெட் 2026: பிப்ரவரி 1-ல் தாக்கல்; நிர்மலா சீதாராமன்

மத்திய நிதியமைச்சர் நிர்மலா சீதாராமன், 2026-27-ம் ஆண்டிற்கான மத்திய பட்ஜெட்டை பிப்ரவரி 1, 2026 அன்று தாக்கல் செய்ய உள்ளார். இது அவர் தொடர்ந்து தாக்கல் செய்யும் 9-வது பட்ஜெட்டாகும் மற்றும் நரேந்திர மோடி தலைமையிலான என்.டி.ஏ 3.0 அரசாங்கத்தின் 3-வது முழுமையான பட்ஜெட்டாகும். இந்த பட்ஜெட் ஒரு ஞாயிற்றுக்கிழமை தாக்கல் செய்யப்படுகிறது, இது சமீபத்திய ஆண்டுகளில் இல்லாத ஒரு அபூர்வ நிகழ்வாகும்.
ஜனவரி 28 முதல் ஏப்ரல் 2 வரை நாடாளுமன்ற பட்ஜெட் கூட்டத்தொடர்

நாடாளுமன்றத்தின் பட்ஜெட் கூட்டத்தொடர் ஜனவரி 28-ம் தேதி தொடங்கி ஏப்ரல் 2-ம் தேதி வரை நடைபெறும் என்று மத்திய நாடாளுமன்ற விவகாரங்கள் துறை அமைச்சர் கிரண் ரிஜிஜு அறிவித்துள்ளார். எக்ஸ் தளத்தில் வெளியிட்ட பதிவில், மத்திய அரசின் பரிந்துரையின் பேரில் 2026 பட்ஜெட் கூட்டத்தொடருக்காக நாடாளுமன்றத்தின் இரு அவைகளையும் கூட்டுவதற்கு குடியரசுத் தலைவர் திரௌபதி முர்மு ஒப்புதல் அளித்துள்ளதாக ரிஜிஜு தெரிவித்துள்ளார்.

இந்த பட்ஜெட் தாக்கலின் மூலம், மன்மோகன் சிங், அருண் ஜெட்லி, ப. சிதம்பரம், யஷ்வந்த் சின்ஹா மற்றும் மொரார்ஜி தேசாய் உள்ளிட்ட முன்னாள் நிதியமைச்சர்களை விட அதிக எண்ணிக்கையிலான மத்திய பட்ஜெட்டுகளை தாக்கல் செய்தவர் என்ற பெருமையை நிர்மலா சீதாராமன் முறியடிப்பார். இந்த அறிவிப்புகள் வரும் நிதியாண்டிற்கான இந்தியாவின் பொருளாதாரப் பாதையை வடிவமைப்பதில் முக்கியப் பங்கு வகிக்கும் என்று எதிர்பார்க்கப்படுகிறது.
பட்ஜெட் உரை மத்திய பட்ஜெட்டின் அதிகாரப்பூர்வ இணையதளத்தில் (indiabudget.gov.in), சன்சாத் டிவி மற்றும் தூர்தர்ஷனில் நேரலையாக ஒளிபரப்பப்படும். பல தேசிய செய்தி சேனல்களும் நேரலை ஒளிபரப்பை வழங்கும், அதே நேரத்தில் சன்சாத் டிவி, தூர்தர்ஷன் மற்றும் பத்திரிகை தகவல் அலுவலகம் (PIB) ஆகியவை தங்களது யூடியூப் தளங்களில் நேரலை செய்வதோடு சமூக வலைதளங்களிலும் உடனுக்குடன் தகவல்களை வழங்கும்.

இவை தவிர, இந்தியன் எக்ஸ்பிரஸ் (indianexpress.com) இணையதளத்தில் மத்திய பட்ஜெட் தாக்கல் மற்றும் அதன் பகுப்பாய்வு குறித்த நேரடித் தகவல்களை நீங்கள் தெரிந்துகொள்ளலாம்.
புதிய வரி முறையின்கீழ் ரூ. 12 லட்சம் வரையிலான ஆண்டு வருமானத்திற்கு வரி விலக்கு அளிக்கப்பட்ட 2025-26 பட்ஜெட்டின் முக்கிய அறிவிப்பைத் தொடர்ந்து, வரி செலுத்துவோரிடையே எதிர்பார்ப்புகள் அதிகமாக உள்ளன. இந்த ஆண்டு, வரி செலுத்துவோர் மேலும் வருமான வரி சலுகைகள், எளிமைப்படுத்தப்பட்ட விதிமுறைகள் மற்றும் பல்வேறு துறைகளுக்கான இலக்கு பலன்களை எதிர்பார்க்கின்றனர்.

பட்ஜெட்டிற்கு முன்னதாக, புள்ளியியல் மற்றும் திட்ட அமலாக்க அமைச்சகம் வெளியிட்ட தரவுகளின்படி, இந்தியாவின் ஜி.டி.பி வளர்ச்சி நடப்பு நிதியாண்டில் 7.4 சதவீதமாக இருக்கும் என்று கணிக்கப்பட்டுள்ளது, இது 2024-25-ல் இருந்த 6.5 சதவீதத்தை விட அதிகமாகும். இருப்பினும், பணவீக்கத்திற்கு ஏற்ப மாற்றப்படாத பெயரளவு ஜி.டி.பி வளர்ச்சி ஐந்து ஆண்டுகளில் இல்லாத அளவுக்கு 8 சதவீதமாகக் குறையும் என்று எதிர்பார்க்கப்படுகிறது, இது 2026-27 பட்ஜெட்டில் வரி வருவாயை மதிப்பிடுவதற்கான முக்கிய காரணியாகும்.
கிசான் கிரெடிட் கார்டு (கே.சி.சி) மூலம் பெறப்படும் கடன்களுக்கான வட்டி மானியத் திட்டத்தின் கீழ் கடன் வரம்பை ரூ.3 லட்சத்திலிருந்து ரூ.5 லட்சமாக உயர்த்துதல், பருத்தி உற்பத்தித்திறனுக்கான ஒரு மிஷன் மற்றும் அதிக மகசூல் தரும் விதைகளுக்கான தேசிய மிஷனை அமைத்தல் ஆகியவை அடங்கும். மேம்படுத்தப்பட்ட கே.சி.சி கடனை அறிவிக்கும் போது, இந்தத் திட்டம் 7.7 கோடி விவசாயிகள், மீனவர்கள் மற்றும் பால் பண்ணையாளர்களுக்கு குறுகிய காலக் கடன்களை எளிதாக்குகிறது என்றும், அதிக கடன் வரம்பு நிறுவனக் கடன்களைப் பெறுவதை மேம்படுத்தும் என்றும் சீதாராமன் கூறியிருந்தார்.

இந்தியா சினிமா தமிழ்நாடு

Namadhu Arasu January 19, 2026January 19, 2026 arrahman, India, tamilcinema, Tamilnadu

யாரையும் புண்படுத்தும் நோக்கம் இல்லை” – சர்ச்சைகளுக்கு இசையமைப்பாளர் ஏ.ஆர்.ரகுமான் முற்றுப்புள்ளி!

வந்தே மாதரம் மற்றும் மா துஜே சலாம் பாடலை பாட மறுத்ததாக எழுந்த சர்ச்சைக்கு தனது பாணியில் இசையமைப்பாளர் ஏ.ஆர்.ரகுமான் தனது விளக்கத்தைத் தந்துள்ளார்.
தனது சமீபத்திய பேட்டியில் இதுபற்றி பேசியுள்ள ஏ.ஆர்.ரகுமான், இசை எப்போதும் ஒரு கலாசாரத்தை இணைப்பதற்கும், கொண்டாடுவதற்கும், கௌரவிப்பதற்கான வழியாகத்தான் இருந்துள்ளதாக கூறியுள்ளார். அதே நேரத்தில் யாரையும் புண்படுத்தும் நோக்கம் தனக்கு ஒருபோதும் இருந்ததில்லை என்று குறிப்பிட்டுள்ளார்.
இந்தியாவின் குடிமகனாக இருப்பதன் மூலம், அதிர்ஷ்டசாலியாக உணர்வதாகவும் இந்தியா தனது வீடு, தனது உத்வேகம் என்றும் ஏ.ஆர்.ரகுமான் குறிப்பிட்டுள்ளார்
பிரதமரின் முன்னிலையில் வேவ் உச்சி மாநாட்டில் பங்கேற்றது முதல், இளம் நாகா இசைக்கலைஞர்களுடன் இணைந்து வாத்தியக் குழுவை உருவாக்கியது வரை பன்முகத்தன்மையுடன் பணியாற்றியதை எடுத்துக்கூறியுள்ளார். படைப்புச் சுதந்திரத்தை மதிக்கும் இந்தியாவின் குடிமகனாக இருப்பதன் மூலம், அதிர்ஷ்டசாலியாக உணர்வதாகவும் இந்தியா தனது வீடு, தனது உத்வேகம் என்றும் ஏ.ஆர்.ரகுமான் குறிப்பிட்டுள்ளார்.

இந்தியா உலகம்குற்றம்நிகழ்ச்சிகள்

Namadhu Arasu November 11, 2025November 11, 2025 cabinetmeet, India, modi

டெல்லி கார் குண்டு வெடிப்பு சம்பவம்.. பிரதமர் மோடி தலைமையில் நாளை பாதுகாப்பு அமைச்சரவை கூட்டம்!

பிரதமர் நரேந்திர மோடியின் பூடான் பயணத்தைத் தொடர்ந்து, நாளை பாதுகாப்பிற்கான அமைச்சரவைக் கூட்டம் நடைபெறவுள்ளது.
அண்டை நாடான பூடானுக்கு பிரதமர் மோடி இரண்டு நாட்கள் அரசுமுறைப் பயணமாக இன்று செல்கிறார். இப்பயணத்தின்போது, பூடான் மன்னர் ஜிக்மே கேசர் நாம்கியெல் வாங்சுக் (Jigme Khesar Namgyel Wangchuck), பிரதமர் ஷெரிங் தோபே ஆகியோரை சந்தித்து இருதரப்பு உறவுகளை மேம்படுத்துவது குறித்து விரிவான பேச்சுவார்த்தை நடத்தவுள்ளார்.
மேலும், தற்போதைய மன்னரின் தந்தையும், முன்னாள் மன்னருமான ஜிக்மே சிங்கியே வாங்குசுங்கின் 70ஆவது பிறந்தநாள் விழாவிலும் பங்கேற்று சிறப்பிக்கவுள்ளார். அப்போது, இந்தியாவின் நிதியுதவியுடன் பூடானில் கட்டப்பட்டுள்ள ஆயிரத்து 20 மெகாவாட் திறன் கொண்ட மிகப்பெரிய நீர்மின் நிலையத்தை பிரதமர் மோடியும், பூடான் மன்னரும் இணைந்து திறந்து வைக்கவுள்ளனர்.
இதைத் தொடர்ந்து, நாளை இந்தியா திரும்பும் பிரதமர் நரேந்திர மோடி தலைமையில் பாதுகாப்பிற்கான அமைச்சரவைக் கூட்டம் நடைபெறவுள்ளது. அப்போது, டெல்லி கார் குண்டு வெடிப்பு சம்பவம் உள்ளிட்ட பல்வேறு பாதுகாப்பு விவகாரங்கள் குறித்து விரிவான ஆலோசனை நடைபெறும் எனக் கூறப்படுகிறது.
டெல்லியில் குண்டுவெடிப்பு நடந்த கார் அரியானா பதிவெண் கொண்டது என்பதும், அதன் தற்போதைய உரிமையாளர் புல்வாமாவைச் சேர்ந்தவர் என்பதும் அம்பலமாகியுள்ளது.
டெல்லி கார் குண்டுவெடிப்பு சம்பவத்திற்கும், ஹரியானாவில் 350 கிலோ வெடி பொருட்கள் பறிமுதல் செய்யப்பட்டதற்கும் ஏதேனும் தொடர்புள்ளதா என்ற கோணத்தில் புலனாய்வு அமைப்புகள் விசாரணையைத் தீவிரப்படுத்தியுள்ளன. காஷ்மீரில் பயங்கரவாத அமைப்பினருக்கு ஆதரவாக நோட்டீஸ் ஒட்டப்பட்டது குறித்து நடத்தப்பட்ட விசாரணையில், கடந்த வாரம் உத்தரபிரதேசத்தின் சாஹரான்பூரில் அடில் அகமது என்ற மருத்துவர் கைது செய்யப்பட்டார். அவருக்குச் சொந்தமான லாக்கரில் இருந்து ஏ.கே 47 வகை துப்பாக்கி கண்டெடுக்கப்பட்டது.
காஷ்மீர் டூ டெல்லி – வெடித்த காரின் அதிர்ச்சி பின்னணி!
டெல்லியில் குண்டுவெடிப்பு நடந்த கார் அரியானா பதிவெண் கொண்டது, உரிமையாளர் புல்வாமாவைச் சேர்ந்தவர்.

கார் 2014 முதல் நான்கு முறை முறைகேடாக விற்பனை செய்யப்பட்டு, பெயர் மாற்றம் செய்யப்படவில்லை.

சென்னையில் மக்கள் அதிகம் கூடும் இடங்களில் கண்காணிப்பு தீவிரம், பாதுகாப்பு பலப்படுத்தப்பட்டுள்ளது.

இந்தியா உலகம்நிகழ்ச்சிகள்வணிகம்

Namadhu Arasu October 17, 2025October 17, 2025 crudeoil, India

ரஷ்ய கச்சா எண்ணெய் கொள்முதல் குறித்த கருத்துக்கு இந்தியா பதிலடி

மோடி – டிரம்ப் இடையே பேச்சுவார்த்தை நடக்கவில்லை: ரஷ்ய கச்சா எண்ணெய் கொள்முதல் குறித்த கருத்துக்கு இந்தியா பதிலடி
ஒரு அறிக்கையில், நிலையற்ற எரிசக்திச் சூழலில் இந்திய நுகர்வோரின் நலன்களைப் பாதுகாப்பதற்காகவே இந்தியாவின் இறக்குமதி கொள்கைகள் வழிநடத்தப்படுகின்றன என்று இந்தியா கூறியிருந்தது.
பிரதமர் நரேந்திர மோடி, டெல்லி, ரஷ்ய எண்ணெயை வாங்குவதை நிறுத்தப்போவதாக தனக்கு உறுதியளித்ததாக அமெரிக்க அதிபர் டொனால்ட் டிரம்ப் கூறிய சில மணிநேரங்களுக்குப் பிறகு, இரு தலைவர்களுக்கும் இடையே நேற்று (புதன்கிழமை) எந்த உரையாடலும் நடக்கவில்லை என்று இந்திய வெளியுறவுத் துறை தெளிவுபடுத்தியுள்ளது.
“எனக்குக் கிடைத்த தகவலின்படி, நேற்று (புதன்கிழமை) பிரதமர் மோடிக்கும் அமெரிக்க அதிபர் டிரம்புக்கும் இடையே எந்தவிதமான தொலைபேசி உரையாடலும் நடக்கவில்லை” என்று வெளியுறவு அமைச்சகத்தின் செய்தித் தொடர்பாளர் ரந்தீர் ஜெய்ஸ்வால், வியாழக்கிழமை அன்று தனது வாராந்திர பத்திரிகையாளர் சந்திப்பின் போது ஊடகத்தின் கேள்விக்கு பதிலளித்தார்.

முன்னதாக, ஒரு அறிக்கையில், நிலையற்ற எரிசக்திச் சூழலில் இந்திய நுகர்வோரின் நலன்களைப் பாதுகாப்பதற்காகவே இந்தியாவின் இறக்குமதி கொள்கைகள் வழிநடத்தப்படுகின்றன என்று இந்தியா கூறியிருந்தது.

“இந்தியா எண்ணெய் மற்றும் எரிவாயுவின் முக்கிய இறக்குமதியாளர். நிலையற்ற எரிசக்திச் சூழலில் இந்திய நுகர்வோரின் நலன்களைப் பாதுகாப்பதே எங்களின் நிரந்தர முன்னுரிமையாக இருந்து வருகிறது. நம்முடைய இறக்குமதி கொள்கைகள் முழுவதுமாக இந்தக் குறிக்கோளையே வழிநடத்துகின்றன” என்று வெளியுறவுத் துறை செய்தித் தொடர்பாளர் அந்த அறிக்கையில் தெரிவித்தார்.
“நிலையான எரிசக்தி விலைகள் மற்றும் பாதுகாக்கப்பட்ட விநியோகங்களை உறுதிசெய்வதே நம்முடைய எரிசக்தி கொள்கையின் இரட்டை இலக்குகளாகும். இது, சந்தை நிலைமைகளைப் பூர்த்தி செய்ய, எங்கள் எரிசக்தி ஆதாரங்களை விரிவுபடுத்துதல் மற்றும் பல்வகைப்படுத்துதல் ஆகியவற்றை உள்ளடக்கியது” என்று ரஷ்யா உக்ரைன் மீது படையெடுத்த 2022-ம் ஆண்டு தொடக்கத்தில் இருந்து இந்தியாவின் நிலைப்பாட்டை அவர் மீண்டும் வலியுறுத்தினார்.

“அமெரிக்காவைப் பொறுத்தவரை, நாங்கள் பல ஆண்டுகளாக நம்முடைய எரிசக்தி கொள்முதலை விரிவுபடுத்த முயன்று வருகிறோம். இது கடந்த பத்தாண்டுகளில் சீராக முன்னேறியுள்ளது. தற்போதைய நிர்வாகம் இந்தியாவுடன் எரிசக்தி ஒத்துழைப்பை ஆழப்படுத்துவதில் ஆர்வம் காட்டியுள்ளது. இது குறித்து தொடர்ந்து விவாதிக்கப்பட்டு வருகிறது” என்றும் வெளியுறவுத் துறை செய்தித் தொடர்பாளர் மேலும் கூறினார்.
அமெரிக்க அதிபர் டொனால்டு டிரம்ப், வெள்ளை மாளிகையில் புதன்கிழமை நிகழ்வு ஒன்றில் பத்திரிகையாளர்களிடம் பேசுகையில், “இது ஒருபோதும் தொடங்கியிருக்கக் கூடாத போர், ஆனால், ரஷ்யா முதல் வாரத்திலேயே வெற்றி பெற்றிருக்க வேண்டும், இப்போது அவர்கள் நான்காவது ஆண்டிற்குள் செல்கிறார்கள். இது நிறுத்தப்பட வேண்டும் என்று நான் விரும்புகிறேன்” என்று கூறினார்.

“எனவே, இந்தியா எண்ணெய் வாங்கிக் கொண்டிருப்பது எனக்கு மகிழ்ச்சி அளிக்கவில்லை, அவர்கள் [பிரதமர் மோடி] இன்று ரஷ்யாவிலிருந்து எண்ணெய் வாங்க மாட்டார்கள் என்று எனக்கு உறுதியளித்துள்ளார். உடனடியாக இதைச் செய்ய முடியாது என்பது உங்களுக்குத் தெரியும். இதற்குச் சற்று கால அவகாசம் தேவை, ஆனால், அந்தக் கால அவகாசம் விரைவில் முடிவடையும்” என்று அவர் கூறினார்.

“அது ஒரு பெரிய படி. இப்போது சீனாவையும் அதையே செய்ய வைக்கப் போகிறோம்” என்று கூறிய அவர், பெய்ஜிங்கிற்கு அழுத்தம் கொடுப்பது, “நாங்கள் கடந்த வாரம் மத்திய கிழக்கில் செய்ததை விட (போரை நிறுத்த) ஒப்பீட்டளவில் எளிதாக இருக்கும்” என்றும் கூறினார்.

இஸ்ரேலுக்கும் ஹமாஸுக்கும் இடையிலான போர் நிறுத்தத்தையும், அவரால் ஏற்படுத்தப்பட்ட அமைதித் திட்டத்தின் கீழ் பணயக் கைதிகள் விடுவிக்கப்பட்டதையும் அமெரிக்க அதிபர் இங்கே குறிப்பிட்டார்.

“இந்தியா எண்ணெய் வாங்கவில்லை என்றால், அது [ரஷ்யா-உக்ரைன் போரை முடிவுக்குக் கொண்டுவருவது] எளிதாகிறது. ஒரு குறுகிய காலத்திற்குள் அவர்கள் ரஷ்யாவிலிருந்து எண்ணெய் வாங்க மாட்டார்கள் என்று எனக்கு உறுதியளித்துள்ளனர், போர் முடிந்த பிறகு அவர்கள் மீண்டும் ரஷ்யாவுக்குச் செல்வார்கள்” என்று டிரம்ப் கூறினார்.

ரஷ்ய எண்ணெயின் தொடர்ச்சியான இறக்குமதிகள் அதிபர் விளாடிமிர் புதினின் போருக்கு மறைமுகமாக நிதியளிக்கின்றன என்று அமெரிக்கா கருதுவதால், இது குறித்த கவலைகளை பிரதமர் மோடியிடம் எழுப்பியதாகவும் டிரம்ப் மேலும் கூறினார். “இந்தியா எண்ணெய் வாங்கிக் கொண்டிருந்தது எனக்கு மகிழ்ச்சி அளிக்கவில்லை” என்று அவர் கூறினார்.

மோடியுடனான உறவு குறித்து டிரம்ப்

பிரதமர் மோடியுடனான தனது உறவைப் பற்றி டிரம்ப் அன்புடன் பேசினார்.

“மோடி ஒரு சிறந்த மனிதர். அவர் டிரம்பை நேசிக்கிறார்” என்று அவர் தன்னைப் பற்றி மூன்றாம் நபரில் குறிப்பிட்டார். “நான் பல ஆண்டுகளாக இந்தியாவைப் பார்த்து வருகிறேன். இது ஒரு நம்ப முடியாத நாடு, மேலும், ஒவ்வொரு வருடமும் உங்களுக்கு ஒரு புதிய தலைவர் இருப்பார். எனது நண்பர் (மோடி) இப்போது நீண்ட காலமாக அங்கு இருக்கிறார்.”

டிரம்ப் இவ்வாறு கூறியது, இந்தியாவுடன் ஒரு வர்த்தக ஒப்பந்தத்திற்கான தற்போதைய பேச்சுவார்த்தைகளுக்கு மத்தியில் வந்துள்ளது. மேலும், அந்த எண்ணெய் இறக்குமதிகள் காரணமாக இந்தியா மீது அமெரிக்கா 25 சதவிகித வரியை விதித்த கிட்டத்தட்ட 2 மாதங்களுக்குப் பிறகு இந்தக் கருத்து வந்துள்ளது.

இந்தியா தொழில்நுட்பம்நிகழ்ச்சிகள்வணிகம்

Namadhu Arasu October 16, 2025October 16, 2025 ecnomics, GDP, India

இந்தியாவின் ஜிடிபி 6.6% ஆக உயரும்: கணிப்பை விட 0.2% – IMF

நடப்பு நிதியாண்டில் இந்திய பொருளாதார வளர்ச்சி 6.6% ஆக உயரும் என ஐஎம்எப் தனது கணிப்பை உயர்த்தி உள்ளது. சர்வதேச நாணய நிதியம் (ஐஎம்எப்) உலக பொருளாதார கண்ணோட்ட அறிக்கையை வெளியிட்டுள்ளது. அதில் கூறியிருப்பதாவது: இந்தியாவின் மொத்த உள்நாட்டு உற்பத்தி (ஜிடிபி) நடப்பு 2025-26 நிதியாண்டில் 6.4% வளரும் என ஜூலை மாதம் வெளியிட்ட உலக பொருளாதார கண்ணோட்ட அறிக்கையில் குறிப்பிட்டிருந்தோம்.

ஆனால், முதல் காலாண்டில் நிறுவனங்களின் லாபம் கணிசமாக அதிகரித்திருந்தது. 5 காலாண்டுகளில் இல்லாத வகையில், முதல் காலாண்டு ஜிடிபி 7.8% ஆக இருந்தது. மேலும் உள்நாட்டு தேவை அதிகரிப்பு, அரசின் செலவினம் அதிகரிப்பு உள்ளிட்ட சில காரணங்களால், இந்தியாவின் ஜிடிபி நடப்பு நிதியாண்டில் 6.6% ஆக உயரும்.
இந்திய பொருட்களின் இறக்குமதிக்கு அமெரிக்கா கூடுதல் வரி விதித்துள்ளதால், 2026-27 நிதியாண்டில் இந்தியாவின் ஜிடிபி 6.2% ஆக குறையும். முந்தைய கணிப்பில் 6.4% ஆக இருக்கும் என கணித்திருந்தோம். 2025-26ல் உலக நாடுகளின் சராசரி ஜிடிபி 3.2% ஆக இருக்கும். அடுத்த 2026-27 நிதியாண்டில் இது 3.1% ஆக இருக்கும். 2024-25-ல் இது 3.3% ஆக இருந்தது. வளர்ந்த நாடுகளின் சராசரி ஜிடிபி 1.5%ஆக இருக்கும்.
அமெரிக்காவின் ஜிடிபி 2% வளரும். இவ்வாறு அதில் கூறப்பட்டுள்ளது. இதுபோல, இந்தியாவின் ஜிடிபி 6.3% வளரும் என உலக வங்கி ஏற்கெனவே கணித்திருந்தது. இந்நிலையில், இந்த கணிப்பை 6.5% ஆக உலக வங்கி கடந்த மாதம் உயர்த்தியது குறிப்பிடத்தக்கது. ஐஎம்எப் கணிப்பின்படி, உலகில் வேகமாக வளரும் பொருளாதாரமாக இந்தியா உள்ளது.விரைவில் ஜப்பானை பின்னுக்குத் தள்ளி 4-வது பெரிய பொருளாதாரமாக இந்தியா உருவெடுக்கும். அதன் பிறகு, ஜெர்மனியை பின்னுக்குத் தள்ளி 3-ம் இடத்துக்கு முன்னேறும் என்றும் ஐஎம்எப் கணித்துள்ளது.
இந்தியாவின் ஜிடிபி 6.6% ஆக உயரும்: முந்தைய கணிப்பை விட 0.2% உயர்த்தியது ஐஎம்எப்

இந்தியா உலகம்விளையாட்டு

Namadhu Arasu September 29, 2025September 29, 2025 CRICKET, India, indvictory, pakistan

பாகிஸ்தானை வீழ்த்தி 9 ஆவது முறையாக ஆசிய கோப்பையை வென்றது இந்தியா…

இந்தியா மற்றும் பாகிஸ்தான் அணிகள் இறுதிப் போட்டிக்கு முன்னேறியது. இந்த நிலையில் அந்த இரு அணிகள் மோதிய இறுதிப்போட்டி நேற்று துபாய் சர்வதேச கிரிக்கெட் மைதானத்தில் நடைபெற்றது. இதில் டாஸ் வென்ற இந்திய அணியின் கேப்டன் சூரியகுமார் யாதவ் பவுலிங்கை தேர்வு செய்தார்.
8 அணிகள் பங்கேற்ற இந்த ஆசிய கோப்பை கிரிக்கெட் தொடரில் இந்தியா, பாகிஸ்தான், வங்கதேசம், இலங்கை ஆகிய 4 அணிகள் சூப்பர் 4 சுற்றுக்கு தகுதி பெற்றன.
ஆசிய கோப்பை கிரிக்கெட் தொடரில் நடைபெற்ற பரபரப்பான இறுதிப் போட்டியில் பாகிஸ்தானை வீழ்த்தி இந்திய அணி 9 ஆவது முறையாக ஆசிய கோப்பையை வென்றுள்ளது.
இதையடுத்து களம் இறங்கிய பாகிஸ்தான் அணியில் தொடக்க வீரர்கள் சகிப்சதா பர்கான் – பகர் ஜமான் இணை முதல் விக்கெட்டிற்கு 84 ரன்கள் சேர்த்து நல்ல தொடக்கத்தை கொடுத்தது. பர்கான் 57 ரன்னிலும், பகர் ஜமான் 46 ரன்களிலும் ஆட்டமிழந்தனர்.
சைம் அயுப் 14 ரன்களில் ஆட்டமிழக்க அடுத்து வந்த வீரர்கள் ஒற்றை இலக்கத்தில் வெளியேறினர். 19.1 ஓவரில் அனைத்து விக்கெட்டுகளையும் இழந்த பாகிஸ்தான் அணி 146 ரன்கள் மட்டுமே எடுத்தது. இந்திய அணியில் குல்தீப் யாதவ் 4 விக்கெட்டுகளையும், வருண் சக்ரவர்த்தி, பும்ரா, அக்சர் படேல் தலா 2 விக்கெட்டுகளையும் கைப்பற்றினர்.
இதையடுத்து 147 ரன்கள் எடுத்தால் வெற்றி என்ற எளிதான இலக்கை நோக்கி விளையாடிய இந்திய அணிக்கு தொடக்க அதிர்ச்சியாக அமைந்தது. அபிஷேக் சர்மா 5 ரன்களிலும், அவரைத் தொடர்ந்து கேப்டன் சூர்யகுமார் யாதவ் 1 ரன்னிலும், சுப்மன் கில் 12 ரன்னிலும் ஆட்டமிழந்தனர்.
இதனால் இந்திய அணி 4 ஓவர்கள் முடிவில் 3 விக்கெட் இழப்புக்கு 20 ரன்கள் எடுத்து தடுமாறியது. அடுத்து இணைந்த சஞ்சு சாம்சன் – திலக் வர்மா இணை அணியை சரிவிலிருந்து மீட்டது. இருவரும் 57 ரன்கள் பார்ட்னர்ஷிப் அமைத்தனர்.
சாம்சன் 24 ரன்கள் எடுத்து ஆட்டமிழந்தார். பின்னர் இணைந்த திலக் வர்மா – சிவம் துபே இணை 60 ரன்கள் பார்ட்னர்ஷிப் அமைத்தது. பொறுப்புடன் விளையாடிய சிவம் துபே 22 பந்துகளில் தலா 2 சிக்சர் பவுண்டரியுடன் 33 ரன்கள் எடுத்து ஆட்டமிழந்தார்.
கடைசி ஓவரில் அணியின் வெற்றிக்கு 10 ரன்கள் தேவைப்பட்டபோது திலக் வர்மாவும், ரின்கு சிங்கும் களத்தில் இருந்தனர். இந்த ஓவரை ஹாரிஸ் ரவுப் வீசினார். முதல் பந்தில் 2 ரன்கள் எடுக்கப்பட, அடுத்த பந்தை திலக் வர்மா சிக்சருக்கு அனுப்பினார்.
3 ஆவது பந்தில் 1 ரன் எடுக்கப்பட, 4 ஆவது பந்தை ரின்கு சிங் பவுண்டரிக்கு விரட்டியபோது இந்திய அணி 150 ரன்கள் எடுத்து 5 விக்கெட் வித்தியாசத்தில் வெற்றி பெற்றது. திலக் வர்மா 53 பந்துகளில் 4 சிக்சர் 3 பவுண்டரியுடன் 69 ரன்கள் எடுத்து கடைசி வரை களத்தில் நின்றார்.

அரசியல்இந்தியா உலகம்தமிழ்நாடு தொழில்நுட்பம்

Namadhu Arasu September 28, 2025September 28, 2025 h1bvisa, India, it, Tamilnadu, us

H1B visa பிரச்னை ஆபத்தில் ஐ.டி சட்டப்பூர்வ குடியேற்றத்தை பாதுகாக்க இந்தியா வலியுறுத்தல்..

அமெரிக்கா முதலில்’ என்ற கொள்கைக் காலத்தில், H-1B விசாக்களுக்கு எதிராக அமெரிக்கா மிகக் கடுமையான நிலைப்பாட்டை எடுத்துள்ள போதிலும், இந்தியா தனது நிலைப்பாட்டில் உறுதியாக உள்ளது. திறமையான தொழிலாளர்கள் மட்டுமின்றி, ஒட்டுமொத்த சட்டப்பூர்வ குடியேற்றத்தையும் பாதுகாக்கும் விதமாக, தெற்காசிய நாடான இந்தியா தனது கருத்தை வெளிப்படுத்தியுள்ளது. குறிப்பாக, அமெரிக்க அதிபர் டொனால்ட் டிரம்ப், குடியேற்றம் சாராத இந்தப் பணி விசா பிரிவை கடுமையாக மாற்றி அமைத்ததற்கும், கடுமையான விதிமுறைகளைக் கொண்டு வந்ததற்கும் எதிராக இந்தியா பேசியுள்ளது.
புது டெல்லியில் செய்தியாளர்களிடம் பேசிய இந்திய வெளியுறவுத் துறை அமைச்சகத்தின் செய்தித் தொடர்பாளர் ரண்தீர் ஜெய்ஸ்வால், H-1B விசாக்கள் மூலம் திறமையான பணியாளர்கள் வந்து செல்வதால், இந்திய மற்றும் அமெரிக்கப் பொருளாதாரம் நீண்ட காலமாகப் பலன் அடைந்துள்ளதாகத் தெரிவித்துள்ளார். அவர் மேலும் கூறுகையில், “திறமையானவர்களின் நடமாட்டமும் பரிமாற்றங்களும் அமெரிக்காவிலும் இந்தியாவிலும் தொழில்நுட்ப வளர்ச்சி, புதுமை, பொருளாதார வளர்ச்சி, போட்டித்தன்மை மற்றும் செல்வத்தை உருவாக்குதல் ஆகியவற்றில் மகத்தான பங்களிப்பை அளித்துள்ளன,” என்று குறிப்பிட்டார். டிரம்ப் நிர்வாகத்தால் அறிவிக்கப்பட்ட புதிய H-1B மாற்றங்கள் குறித்த கேள்விக்கு, “இது இன்னும் வளர்ந்து வரும் ஒரு சூழ்நிலை. நாங்கள் பல்வேறு மட்டங்களில் தொடர்ந்து தொடர்பில் இருக்கிறோம்,” என்று பதிலளித்தார்.
ரஷ்யா-உக்ரைன் போருக்கு மத்தியில் இரு நாடுகளும் வர்த்தக ஒப்பந்தம் குறித்து பேச்சுவார்த்தை நடத்திக் கொண்டிருந்த அதே வாரத்தில், வர்த்தகத் துறை அமைச்சர் பியூஷ் கோயல் தலைமையில் அமெரிக்காவில் “ஆக்கபூர்வமான சந்திப்புகள்” நடந்த சமயத்தில் இந்தக் கருத்து வெளிவந்துள்ளது. மேலும், அமெரிக்க அதிபர் புதிய H-1B விண்ணப்பங்களுக்கு 100,000 டாலர் கட்டணத்தை விதிக்கும் பிரகடனத்தில் கையெழுத்திட்ட சில நாட்களுக்குப் பிறகு இந்தக் கருத்து வந்துள்ளது குறிப்பிடத்தக்கது.

அமெரிக்க அதிபரின் இந்த முடிவால், கடந்த ஆண்டு H-1B விசா பெற்றவர்களில் 70%-க்கும் அதிகமானோர் இந்திய நாட்டவர்கள் என்பதால், வேறு எந்தக் குழுவையும் விட இந்தியர்கள் மிக அதிகமாகப் பாதிக்கப்படுவார்கள். இந்தியாவின் தொழில்நுட்பத் துறைக்கு 280 டாலர் பில்லியன் ஆதரவு இருக்கும் நிலையில், அமெரிக்க அரசு அமெரிக்கப் பணியாளர்களுக்கு முன்னுரிமை அளிக்க விரும்புவதால், ஆயிரக்கணக்கான வேலைகள் இப்போது ஆபத்தான சூழலில் உள்ளன. தகவல் தொழில்நுட்ப நிறுவனங்களில் ஆட்குறைப்பு மற்றும் பணிநீக்கங்கள் நடந்து வரும் நிலையில், இந்த விசா மாற்றங்கள் மேலும் ஒரு பின்னடைவாக அமையுமோ என்று ஊழியர்கள் அஞ்சுகின்றனர்.
பல அமெரிக்கச் சட்டமியற்றுபவர்கள் சமூக ஊடகங்களில் திறமையானவர்களுக்கான இந்த விசா வகையைப் பற்றித் தொடர்ந்து விமர்சித்து வருகின்றனர். சிலர் H-1B விசா துஷ்பிரயோகம் என்றும், சிலர் அமெரிக்க வல்லுநர்களுக்கான வாய்ப்புகளைப் பறிக்கும் மோசமான செயல் என்றும் குறிப்பிடுகின்றனர்.

குடியரசுக் கட்சியின் அமெரிக்க செனட்டர் எரிக் ஷிமிட் இந்த மாத தொடக்கத்தில், “அமெரிக்காவை ‘போட்டித்தன்மை’ மிக்கதாக வைத்திருக்க H-1B விசா விற்கப்பட்டது. அதற்குப் பதிலாக, அது அமெரிக்கத் தொழிலாளர்களை மாற்றுவதற்காக மில்லியன் கணக்கான வெளிநாட்டினரை இறக்குமதி செய்துள்ளது. மேலும், முழுத் தொழில்களையும் வெளிநாட்டு லாபியிஸ்ட்டுகளின் கைகளில் ஒப்படைத்துள்ளது,” என்று சட்டப்பூர்வ குடியேற்றத்தையும் குறை கூறினார்.

விசா மாற்றத்தின் அதிர்வலைகள் வேலைவாய்ப்புச் சூழலில் தாக்கத்தை ஏற்படுத்துவதன் அறிகுறிகள் இப்போதே தெரிய ஆரம்பித்துவிட்டன. H-1B கட்டணம் அவற்றின் வருவாயைப் பாதித்துள்ளதால், இந்தியாவில் உள்ள மென்பொருள் ஏற்றுமதியாளர்கள் ஏப்ரல் மாதத்திற்குப் பிறகு மிக மோசமான வாரத்திற்குத் தயாராகி வருவதாக ப்ளூம்பெர்க் இந்த வாரம் செய்தி வெளியிட்டுள்ளது. தேசிய பங்குச் சந்தையில் (NSE) பட்டியலிடப்பட்ட பல தகவல் தொழில்நுட்பப் பங்குகள் இந்த வாரம் வியாழக்கிழமை வரை 5.6% சரிந்து, கிட்டத்தட்ட ஆறு மாதங்களில் மிக முக்கியமான வீழ்ச்சியைக் குறித்தது. ஒட்டுமொத்தமாக, நிஃப்டி ஐடி குறியீட்டில் உள்ள பத்து உறுப்பினர்களும் இந்த வாரம் மட்டும் 21 டாலர் மில்லியனுக்கும் அதிகமான சந்தை மதிப்பை இழந்துள்ளனர். டாடா கன்சல்டன்சி சர்வீசஸ் லிமிடெட் (TCS) மற்றும் இன்போசிஸ் லிமிடெட் ஆகியவை இந்தச் சரிவில் பெரும்பங்கு வகித்தன.

அரசியல்இந்தியா உலகம்நிகழ்ச்சிகள்

Namadhu Arasu September 19, 2025September 19, 2025 India, modi import tax, trumph, us

இந்தியா மீது அமெரிக்கா விதித்துள்ள அபராத வரி ரத்து? – பொருளாதார ஆலோசகர்…

இந்தியா மீது அமெரிக்கா விதித்துள்ள அபராத வரி அடுத்த மாதம் ரத்து செய்யப்படும் என நம்பிக்கை தெரிவித்துள்ள தலைமை பொருளாதார ஆலோசகர் ஆனந்த நாகேஸ்வரன், இறக்குமதி வரி 10 முதல் 15 சதவிகிதமாக குறையும் என்று குறிப்பிட்டுள்ளார்.
இந்திய பொருட்கள் மீது 25 விழுக்காடு வரி விதித்த அமெரிக்கா, ரஷ்யாவிடம் எண்ணெய் வாங்குவதற்கு எதிர்ப்பு தெரிவித்து, மேலும் 25 சதவிகித வரியை அபராதமாக விதித்துள்ளது. இது தொடர்பாக, கடந்த திங்கட்கிழமை, டெல்லியில் தெற்கு மற்றும் மத்திய ஆசியாவிற்கான அமெரிக்க வர்த்தக துணை பிரதிநிதி பிரெண்ட் லின்ச் தலைமையிலான குழுவினர், இந்திய அதிகாரிகளுடன் பேச்சுவார்த்தை நடத்தினர்.
இந்திய பொருட்கள் மீதான 25 சதவிகித அபராத வரி நவம்பர் இறுதிக்குள் நீக்கப்படும் என நம்பிக்கை.

இந்திய பொருட்கள் மீதான வரி 10 முதல் 15 சதவிகிதமாக குறையும் என பொருளாதார ஆலோசகர் தெரிவித்தார்.

இந்தியா-அமெரிக்கா இடையிலான வரி பிரச்னைக்கு 8 முதல் 10 வாரங்களில் தீர்வு காணப்படும் என நம்பிக்கை.
கொல்கத்தாவில் நடைபெற்ற வர்த்தக கூட்டமைப்பு நிகழ்ச்சியில் பேசிய இந்திய தலைமை பொருளாதார ஆலோசகர் ஆனந்த நாகேஸ்வரன், இந்தியா மீது அமெரிக்கா விதித்த 25 விழுக்காடு அபராத வரி, நவம்பர் மாத இறுதிக்குள் நீக்கப்படும் என்று கூறினார். மேலும், இந்திய பொருட்கள் மீதான வரி 10 முதல் 15 சதவிகிதமாக குறையும் என்றும் ஆனந்த நாகேஸ்வரன் நம்பிக்கை தெரிவித்தார்.
அமெரிக்க வரி தொடர்பான பிரச்னைக்கு 8 முதல் 10 வாரங்களில் தீர்வு காணப்படும் என்று கூறிய ஆனந்த நாகேஸ்வரன், இது அதிகாரப்பூர்வ அறிவிப்பு இல்லை என்றும் விளக்கம் அளித்தார். இந்தியா-அமெரிக்கா இடையிலான பேச்சுவார்த்தையின் அடிப்படையில், தனது உள்ளுணர்வின் வெளிப்பாடு இது என்றும் ஆனந்த நாகேஸ்வரன் குறிப்பிட்டார்.
அமெரிக்க அதிபர் டிரம்ப், தான் இந்தியாவுக்கு நெருக்கமானவர் என்றும், பிரதமர் மோடிக்கு மிக நெருக்கமானவர் என்று மீண்டும் தெரிவித்துள்ளார். இந்திய இறக்குமதிப் பொருட்களுக்கு அமெரிக்க அரசு 50 சதவீதம் வரி விதித்தது இருநாடுகளுக்கும் இடையேயான உறவில் விரிசலை ஏற்படுத்தியது. இதையடுத்து பிரதமர் மோடியை அடிக்கடி அமெரிக்க அதிபர் டொனால்ட் டிரம்ப் பாராட்டி பேசிவந்தார். இச்சூழலில் பிரதமர் நரேந்திர மோடியின் 75வது பிறந்தநாளுக்கு தொலைபேசி வாயிலாகவும் சமூக வலைதளங்கள் மூலமாகவும் டிரம்ப் வாழ்த்து தெரிவித்தார்.

இந்தியா உலகம்தமிழ்நாடு வணிகம்

Namadhu Arasu August 29, 2025August 29, 2025 India, Tamilnadu, tax, us

அமெரிக்காவின் 50% சதவீத வரி விதிப்பால் இந்தியாவின் பொருளாதாரம் எந்த அளவில் பாதிக்கப்படும்….

இன்று முதல் இந்தியப் பொருள்கள் மீது அமெரிக்கா 50% இறக்குமதி வரி விதிப்பு அமலுக்கு வந்தது, இந்திய பொருளாதாரத்திற்கு பெரும் தாக்கம்.
எந்த உடன்பாடும் எட்டப்படாத நிலையில், இந்தியப் பொருள்கள் மீது 25 சதவிகித வரி விதிக்கப்படும் என டிரம்ப் அறிவித்தார். மேலும் கடந்த 7 ஆம் தேதி முதல் இந்தியப் பொருள்கள் மீதான 25 சதவிகித வரி அமலுக்கு வந்தது. அது மட்டுமின்றி, ரஷ்யாவிடம் இருந்து கச்சா எண்ணெய் இறக்குமதி செய்வதால், இந்தியாவிற்கு அபராதமாக, கூடுதலாக 25 விழுக்காடு வரி விதிக்கப்படும் என டிரம்ப் அறிவித்தார்.
உக்ரைன் போர் நிறுத்தம் குறித்து புதின் உடன் டிரம்ப் பேச்சுவார்த்தை நடத்திய நிலையில், இந்தியா மீதான அபராத வரி நிறுத்தி வைக்கப்படும் என எதிர்பார்க்கப்பட்டது. ஆனால், டிரம்ப் அறிவித்தபடி, இந்திய நேரப்படி இன்று காலை 9.30 மணி முதல், இந்தியப் பொருள்கள் மீதான 50 சதவிகித இறக்குமதி வரி அமலுக்கு வந்தது.
இறக்குமதி வரி செலுத்தும் நிறுவனம், அதன் செலவை ஈடு செய்யும் வகையில், பொருள்களின் விலையை உயர்த்தி அதனை முழுதாகவோ அல்லது பகுதியாகவோ வாடிக்கையாளர்களிடம் இருந்து வசூலிக்கும். இதனால், பொருள்களின் விலை அதிகரிக்கும்.
அதிக வரி விதிப்பதன் மூலம், தானாக பொருள்களின் விலை அதிகரிக்கும். இதன் காரணமாக வாடிக்கையாளர்கள் அந்தப் பொருளை அதிக விலை கொடுத்து வாங்குவதைத் தவிர்ப்பார்கள். இதனால், உற்பத்தியாளர்கள் தங்கள் பொருள்களை வியாபாரம் செய்ய முடியாமல் நட்டத்தைச் சந்திப்பார்கள்.
நிறுவனம் நட்டத்தைச் சந்திக்கும் போது முதல் படியாக அதனைச் சமாளிக்க தனது ஊழியர்களின் அளவைக் குறைக்கும். அந்த வேலையை நம்பியிருந்த குடும்பத்தின் பொருளாதாரம் கேள்விக்குறியாகும்.
ஒரு நாட்டின் மீது அதிக வரிவிதிக்கப்பட்டு, வாடிக்கையாளர்களும் அதனை அதிக விலை கொடுத்து வாங்க முன்வராமல் போக, இறக்குமதி செய்யும் நிறுவனங்கள் அதே பொருள்களை குறைந்த வரி கொண்ட நாடுகளில் இருந்து இறக்குமதி செய்யும். இதன் மூலம், போட்டி நாடுகள் தங்கள் பொருள்களை அந்த நாட்டிற்கு அதிகமாக ஏற்றுமதி செய்து லாபம் அடையும்.
பொதுவாக ஒருநாட்டின் செல்வம் அதன் ஏற்றுமதியின் மூலம் அதிகரிக்கும். எந்த நாடு அதிக ஏற்றுமதி செய்கிறதோ அந்த நாட்டின் செல்வம் அதிகரிக்கும். அதே ஏற்றுமதி குறையும்போது, நாட்டின் வருமானமும் பெரிய அளவில் பாதிக்கப்பட்டு அந்த நாட்டின் பொருளாதாரத்தில் கடுமையான பாதிப்பை ஏற்படுத்தும்.