100 நாட்களில் ஒரு லட்சம் கோடி ரூபாய்க்கு மேல் முதலீடு.. தமிழ்நாடு அரசு
00 நாட்களில் ஒரு லட்சம் கோடி ரூபாய்க்கு மேல் முதலீடுகளை ஈர்த்துள்ளதாக தமிழ்நாடு அரசு பெருமிதம் தெரிவித்துள்ளது.
சென்னையில் நடைபெற்ற வெற்றி தமிழ்நாடு முதலீட்டாளர்கள் மாநாட்டில் முதலமைச்சர் விஜய் முன்னிலையில் 67 ஆயிரம் கோடி ரூபாய் முதலீட்டிற்கான ஒப்பந்தங்கள் கையெழுத்தாகின. இதன்மூலம், 100 நாட்களில் ஒரு லட்சம் கோடி ரூபாய்க்கு மேல் முதலீடுகளை ஈர்த்துள்ளதாக தமிழ்நாடு அரசு பெருமிதம் தெரிவித்துள்ளது.
ஜெர்மனி, அமெரிக்கா, தென்கொரியா, ஜப்பான் உள்ளிட்ட 15 நாடுகளைச் சேர்ந்த நிறுவனங்கள் பங்கேற்ற இந்த மாநாட்டில், முதலமைச்சர் விஜய் முன்னிலையில் 97 புரிந்துணர்வு ஒப்பந்தங்கள் கையெழுத்தாகின. 67 ஆயிரத்து 452 கோடி ரூபாய் முதலீட்டில், தமிழ்நாட்டின் 20 மாவட்டங்களில் தொழில் தொடங்கும் வகையிலும், ஒரு லட்சத்து 6 ஆயிரத்து 998 பேருக்கு வேலைவாய்ப்பு வழங்கும் வகையிலும் இந்த ஒப்பந்தங்கள் கையெழுத்தானதாக தமிழ்நாடு அரசு தெரிவித்துள்ளது.
ராக்கெட் தயாரிக்கும் தனியார் நிறுவனமான ஸ்கைரூட் ஏரோஸ்பேஸ் மற்றும் மீண்டும் பயன்படுத்தக்கூடிய வகையிலான ராக்கெட் தயாரிக்கும் அக்னிகுல் காஸ்மோஸ் ஆகிய 2 நிறுவனங்கள் தூத்துக்குடியில் முதலீடு செய்யவுள்ளன. இதேபோல, காஞ்சிபுரம் மாவட்டத்தில் 5 ஆயிரத்து 143 கோடி ரூபாயில் டயர் உற்பத்தி ஆலையை அமைக்க ஜே.கே.டயர் நிறுவனமும், 300 கோடியில் HVAC கம்ப்ரசர் உற்பத்தி ஆலையைத் தொடங்க ஜெர்மனியின் BITZER நிறுவனமும் ஒப்பந்தம் செய்துள்ளன.
